భారతీయులు అధిక సంఖ్యలో అమెరికా పౌరసత్వం పొందారు. 2022 సంవత్సరంలో సహజంగా అమెరికా పౌరసత్వం పొందిన దేశాల్లో మెక్సికో, భారత్ మొదటి రెండు స్థానాల్లో నిలిచాయి.1,28,878 మంది పౌరులతో మెక్సికో, 65,960 మంది పౌరులతో భారతీయులకు సిటిజెన్షిప్ లభించింది.
అగ్రరాజ్యంలో 2022 నాటికి 4.6 కోట్ల మంది విదేశీయులు నివసిస్తున్నారు. 33.3 కోట్ల యూఎస్ జనాభాలో ఇది 14 శాతానికి సమానం. వీరిలో 2.45 కోట్ల మంది తమని తాము సహజీకృత పౌరులుగా పేర్కొన్నారు. మొత్తంగా 2022లో 9,69,380 మంది ఈ పద్ధతి ద్వారా అమెరికా పౌరులుగా మారారని ఇండిపెండెంట్ ‘కాంగ్రెషనల్‌ రీసెర్చ్‌ సర్వీస్‌ (CRS)’ నివేదిక తెలిపింది.
అదే ఏడాదిలో 1,28,878 మంది మెక్సికన్లు అమెరికన్‌ పౌరులుగా మారారు. తర్వాత భారత్ (65,960), ఫిలిప్పీన్స్‌ (53,413), క్యూబా (46,913), డొమినికన్‌ రిపబ్లిక్‌ (34,525), వియత్నాం (33,246), చైనా (27,038) ఉన్నాయి. అయితే, భారత్‌లో పుట్టి, అమెరికాలో ఉంటున్నవారిలో దాదాపు 42 శాతం మందికి అగ్రరాజ్య పౌరసత్వం పొందే అర్హత లేదని సీఆర్‌ఎస్‌ నివేదిక వెల్లడించింది. 2023 నాటికి గ్రీన్ కార్డు లేదా లీగల్‌ పర్మినెంట్‌ రెసిడెన్సీ (LPR) ఉన్న 2,90,000 మంది భారతీయులు నాచురలైస్డ్ సిటిజెన్షిప్ పొందే అవకాశం ఉందని పేర్కొంది.
సహజీకృత పౌరసత్వం కోసం వచ్చే అప్లికేషన్ల సంఖ్య 2023 ముగిసే నాటికి 4,08,000గా ఉన్నట్లు సీఆర్‌ఎస్‌ నివేదిక పేర్కొంది. 2023లో కొత్తగా 8,23,702 మంది ఎల్‌పీఆర్‌ ఉన్నవారు నేచురలైజేషన్‌ కింద పౌరసత్వం కోసం ఆప్లై చేసుకున్నారు. దాదాపు 90 లక్షల మంది వరకు దానికి అర్హత ఉన్నప్పటికీ, చాలా తక్కువ సంఖ్యలో అప్లికేషన్లు వచ్చాయని నివేదిక వెల్లడించింది.
అగ్రరాజ్య సహజీకృత పౌరసత్వం ఇచ్చేందుకు అనేక అంశాలను పరిగణనలోకి తీసుకుంటారు. జన్మించిన దేశంతో పాటు కనీసం ఐదేళ్ల పాటు ఎల్‌పీఆర్‌లు అయ్యి ఉండాలి. హోండురస్‌, గ్వాటిమాలా, వెనిజువెలా, మెక్సికో, ఎల్‌ సాల్వెడార్‌, బ్రెజిల్‌ వారికి తక్కువ ప్రాధాన్యం ఇస్తారు. వియత్నాం, ఫిలిప్పీన్స్‌, రష్యా, జమైకా, పాకిస్థాన్‌ వారికి అధిక ప్రాధాన్యం ఉంటుంది.
