– ఆమోదం తెలిపిన ఐవోసీ
ఇదే నిజం, నేషనల్ బ్యూరో: ప్రతిష్ఠాత్మక ఒలింపిక్స్లో క్రికెట్‌ రీ ఎంట్రీకి ఆమోదం లభించింది. ఎప్పుడెప్పుడు విశ్వక్రీడల్లో క్రికెట్‌ను చూస్తామా అని ఎదురు చూస్తున్న అభిమానుల ఆశలు మరో ఐదేండ్లలో నెరవేరబోతున్నాయి. లాస్‌ ఏంజిల్స్‌ వేదికగా 2028లో జరిగే ఒలింపిక్స్లో క్రికెట్‌ను భాగం చేసేందుకు అంతర్జాతీయ ఒలింపిక్‌ కమిటీ ఆమోదం తెలిపింది. ఈ నెల 13న సమావేశమైన ఐవోసీ ఎగ్జిక్యూటివ్‌ బోర్డు..
క్రికెట్‌తో పాటు సాఫ్ట్‌బాల్‌, ఫ్లాగ్‌ ఫుట్‌బాల్‌, లాక్రోస్సె (సిక్సెస్‌), స్కాష్‌ను ఒలింపిక్స్లో భాగం చేయబోతున్నట్లు తెలిపింది. ఆ మేరకు ఆదివారం నుంచి ముంబైలో మొదలైన ఐవోసీ సెషన్స్‌లో ఈ ప్రతిపాదనను సభ్యుల ముందు ఉంచి ఓటింగ్‌ చేపట్టింది. ఈ ఓటింగ్‌లో 2028 నుంచి ఒలింపిక్స్లో క్రికెట్‌ ప్రవేశం ప్రతిపాదనకు ఆమోదం లభించింది. దాంతో లాస్‌ఏంజిల్స్‌ ఒలింపిక్స్లో పురుషుల, మహిళల క్రికెట్‌ జట్లు టీ20 ఫార్మాట్‌లో బరిలోకి దిగనున్నాయి.
