అయోధ్య సందడిలో కొడుకుకు నామకరణం చేసిన కన్నడ హీరో

అయోధ్య రామమందిర ప్రారంభోత్సవం అంగరంగ వైభవంగా జరిగింది. జనవరి 22 వ తేదీన 12.29 నిమిషాలకు అభిజిత్‌ లగ్నంలో బాలరాముడి ప్రాణప్రతిష్ఠ మహోత్సవం జరిగింది. దీంతో 500 ఏళ్ల రామ భక్తుల కల సాకారమైంది. రాముడు కొలువు దీరడంతో దేశమంతా భక్తి భావనలో మునిగిపోయింది. ఈ నేపథ్యంలో బాల రాముడి కొలువుదీరిన శుభ ముహూర్తంలోనే తన పిల్లలకు నామకరణం చేశాడు కన్నడ స్టార్‌ హీరో ధ్రువ్‌ సర్జా. స్వయంగా ఆంజనేయుని భక్తుడైన అతను రామ భక్తిని ఇలా చాటుకున్నాడు. ఇక హనుమంతుడి పేరు వచ్చేలా తన కూతురుకు రుద్రాక్షి అని, కుమారుడికి హయగ్రీవ అని పేర్లు పెట్టడం విశేషం. ధృవ సర్జా, ప్రేరణ నవంబర్ 2019 లో వివాహం చేసుకున్నారు. ప్రేరణ, ధృవ సర్జాలకు ఇద్దరు పిల్లలు. 2022 అక్టోబర్‌లో ఒక కూతురు పుట్టింది. ఆ తర్వాత సెప్టెంబర్ 2023లో ఒక అబ్బాయి పుట్టాడు. అయితే ఇప్పటివరకు ఇద్దరికీ పేర్లు పెట్టలేదు. ఇప్పుడు కూతురికి రుద్రాక్షి అని, కొడుకుకి హయగ్రీవ అని పేరు పెట్టారు. తన సోదరుడు చిరంజీవి సర్జా సమాధి దగ్గరే నామకరణం ఫంక్షన్‌ను నిర్వహించాడు ధ్రువ్‌ సర్జా. ఈ కార్యక్రమం అంగరంగ వైభవంగా జరిగింది. ఈ కార్యక్రమంలో ధ్రువ సర్జా, ప్రేరణ, నటి మేఘనా రాజ్ తదితరులు పాల్గొన్నారు. పొగరు సినిమాతో తెలుగు ప్రేక్షకులకు బాగా చేరువయ్యాడు ధ్రువ్‌ సర్జా. త్వరలోనే మరో పాన్‌ ఇండియా సినిమాతో మన ముందుకు వస్తున్నాడీ స్టార్‌ హీరో. అతను నటిస్తోన్న ‘మార్టిన్’ సినిమా విడుదల కోసం అభిమానులు ఎదురుచూస్తున్నారు. సీనియర్ యాక్షన్ హీరో అర్జున్ కి ఈ హీరో దగ్గరి బంధువు కూడా.