– ఢిల్లీలో దారుణం
ఇదే నిజం, నేషనల్ బ్యూరో: రూ.350 కోసం ఓ బాలుడు.. యువకుడిని హత్య చేశాడు. మంగళవారం రాత్రి ఢిల్లీలో జరిగిన ఈ ఘటన ఆలస్యంగా వెలుగులోకి వచ్చింది. పోలీసులు తెలిపిన వివరాల ప్రకారం.. నార్త్ ఢిల్లీలోని వెల్‌కమ్‌ ఏరియాలో నడుచుకుంటూ వెళ్తున్న ఓ యువకుడిపై బాలుడు దాడికి దిగాడు. బాధితుడిపై దాడి చేసి ఊపిరాడనీయలేదు. అతడు స్పృహ కోల్పోయిన తర్వాత తన వద్ద ఉన్న కత్తితో దాదాపు 60 సార్లు పొడిచాడు. దీంతో బాధితుడు ప్రాణాలు కోల్పోయాడు. అనంతరం అతడి వద్ద ఉన్న రూ.350 క్యాష్ తీసుకొన్నాడు. కొద్దిసేపు మృతదేహం ఎదుట డాన్స్‌ చేస్తూ.. పైశాచికంగా ప్రవర్తించాడు. ఈ దారుణమంతా సమీపంలోని సీసీటీవీలో రికార్డు అయ్యింది. సమాచారం అందుకున్న పోలీసులు ఘటనా స్థలానికి చేరుకున్నారు. కొన ఊపిరితో ఉన్న బాధితుడిని ఆసుపత్రికి తరలించారు. అప్పటికే ఆ యువకుడు చనిపోయినట్లు డాక్టర్లు నిర్ధారించారు. కేసు ఫైల్ చేసిన పోలీసులు సీసీటీవీ పుటేజీని పరిశీలించగా.. ఈ దారుణం వెలుగులోకి వచ్చింది. దర్యాప్తు చేపట్టిన పోలీసులు మైనర్ను అరెస్టు చేశారు. చనిపోయిన వ్యక్తితో బాలుడికి గతంలో ఎలాంటి పరిచయం లేదని తేలింది. కేవలం డబ్బు కోసమే హత్యకు పాల్పడినట్లు పోలీసులు తెలిపారు.
