సుకుమార్ దర్శకత్వంలో టాలీవుడ్ ఐకాన్ స్టార్ అల్లు అర్జున్ హీరోగా నటిస్తున్న తాజా చిత్రం పుష్ప-2 . పుష్ప ఫస్ట్ పార్ట్ ఓ రేంజ్ లో బ్లాక్ బస్టర్ హిట్ కావడంతో ఇప్పుడు దానికి సీక్వెల్గా పుష్ప-ది రూల్ ను తెరకెక్కిస్తున్న విషయం తెలిసిందే. అయితే నేషనల్ క్రష్ అంటూ ఫ్యాన్స్ ముద్దుగా పిలుచుకునే రష్మిక మందన బర్త్‌డే కావడంతో పుష్ప 2 టీమ్ సర్‌ప్రైజ్ ఇచ్చింది. ఈ మూవీలో శ్రీవల్లి పాత్రలో రష్మిక నటిస్తున్న సంగతి తెలిసిందే.
తాజాగా ఆమె లుక్‌ను రివీల్ చేస్తూ ఓ స్పెషల్ పోస్టర్‌ను విడుదల చేసింది మూవీ టీమ్. ప్రస్తుతం ఈ పోస్టర్ తెగ వైరల్ అవుతోంది. ఈ పోస్టర్‌లో పట్టుచీర కట్టుకొని, ఒంటి నిండా బంగారంతో ధగధగ మెరిసిపోతుంది రష్మిక. చేతికి గాజులు, మెడలో హారాలు, నల్లపూసలు, నడుముకి వడ్డాణంతో ఎక్కడా రిచ్‌నెస్‌లో తగ్గేదేలే అనేలా ఉంది శ్రీవల్లి. ఈ పోస్టర్‌ను షేర్ చేస్తూ మైత్రి మూవీ మేకర్స్ రష్మికకి బర్త్ డే విషెస్ చెప్పారు.
