Chandrababu : ఎక్కువ మంది పిల్లల్ని కనండి.. బోలెడన్ని లాభాలు పొందండి

Chandrababu : అనంతపురం జిల్లా ఉరవకొండ నియోజకవర్గం ఛాయాపురంలో ఏపీ సీఎం చంద్రబాబు బహిరంగ సభ నిర్వహించారు. ఈ సభలో చంద్రబాబు మాట్లాడుతూ.. పెద్ద కుటుంబాలను ప్రోత్సహించేందుకు ఎక్కువ సౌకర్యాలు మరియు ఆర్థిక సహాయం అందిస్తామని ప్రకటించారు. రాష్ట్రంలో జనాభా తగ్గుదలను అరికట్టేందుకు, యువ శక్తిని పెంపొందించేందుకు చంద్రబాబు ఈ వ్యాఖ్యలు చేసారు. చంద్రబాబు రాష్ట్రంలో వృద్ధ జనాభా సమస్యను ఎదుర్కోవడానికి ఎక్కువ మంది పిల్లలను కనే కుటుంబాలకు ప్రోత్సాహకాలు (ఇన్సెంటివ్స్) అందిస్తామని ప్రతిపాదించారు. ఈ క్రమంలో పెద్ద కుటుంబాలకు ఆర్థిక భద్రత మరియు అదనపు సదుపాయాలు కల్పించడం ద్వారా కుటుంబ వ్యవస్థను బలోపేతం చేయాలనే లక్ష్యాన్ని వెల్లడించారు.

అలాగే పాకిస్తాన్ మనపై దాడి చేస్తోందని, రెచ్చగొట్టే చర్యలు తీసుకుంటోందని చంద్రబాబు అన్నారు. దేశం కోసం చాలా మంది యువత రక్షణ రంగంలోకి అడుగుపెడుతున్నారని ఆయన అన్నారు. మన తెలుగు మురళీ నాయక్ ఉగ్రవాదులతో పోరాడుతూ వీర మరణం పొందడం చాలా బాధాకరం అని చంద్రబాబు అన్నారు. వారి తల్లిదండ్రులతో మాట్లాడి తన ప్రగాఢ సానుభూతిని వ్యక్తం చేశానని ఆయన అన్నారు. మురళీ నాయక్ కుటుంబానికి తాను అండగా నిలుస్తానని హామీ ఇచ్చారు. యుద్ధ సమయంలో రాష్ట్రంలోని అన్ని ప్రాంతాలు అప్రమత్తంగా ఉండాలని చంద్రబాబు అన్నారు.