హోలీని భారతదేశంలోని వివిధ ప్రాంతాలలో ‘వసంత పండుగ’గా జరుపుకుంటారు. రంగులు చల్లుకుంటూ ఎంతో ఉత్సాహంగా పండుగ చేసుకుంటాం. హోలీ వేడుకలో అనేక రంగులను ఉపయోగిస్తారు. అయితే, ఈ హోలీ రంగులు తీవ్రమైన అనారోగ్య సమస్యలను కలిగిస్తాయని ఆరోగ్య నిపుణులు హెచ్చరిస్తున్నారు. హోలీకి ఉపయోగించే రసయన రంగుల కారణంగా శ్వాసకోశ, చర్మం, కళ్లకు సంబంధించిన సమస్యలు తలెత్తే ప్రమాదం ఉంటుంది. అలర్జీలు ఉన్నవారు మరింత జాగ్రత్తగా ఉండాలని చెబుతున్నారు. కొన్ని హోలీ రంగులలో భారీ లోహాలు, రసాయనాలు, పురుగుమందులు కూడా ఉంటాయి. హోలీ రంగులు బ్యాక్టీరియా చర్మ ఇన్ఫెక్షన్లు, చర్మ అలెర్జీలు, కాంటాక్ట్ డెర్మటైటిస్, దురదలకు కారణమవుతాయి. అందుకే రంగులు చల్లుకునే ముందు వాటి ప్రభావం చర్మంపై పడకుండా, చర్మానికి కొబ్బరి నూనె రాసుకోవాలి. రసాయన రంగుల నుంచి చర్మాన్ని నూనె కాపాడుతుందని నిపుణులు సూచిస్తున్నారు. హోలీ రంగులు పొరపాటున నోట్లోకి వెళితే..ఆస్తమా, బ్రోన్కైటిస్, క్రానిక్ అబ్స్ట్రక్టివ్ పల్మనరీ డిసీజ్ వంటి సమస్యలు వచ్చే అవకాశాలు ఎక్కువగా ఉంటాయి.
ఇది శ్వాసలో గురక, దగ్గు, కఫం ఉత్పత్తికి కారణమవుతుంది. హోలీ రంగుల్లో క్రోమియం ఉంటుంది. రసాయనాలతో తయారు చేసిన రంగుల వల్ల క్యాన్సర్‌ కూడా రావచ్చు. రంగుల్లో ఉండే కొన్ని రసాయనాలు మనకు అస్తమా, ఇతర శ్వాసకోస వ్యాధులను కలగజేస్తాయి. హోలీలో ఉపయోగించే వాటర్-గన్‌లు లేదా వాటర్ బెలూన్‌లతో హోలీ ఆడటం వల్ల ఆ నీరు చెవ్వుల్లోకి కూడా వెళ్తుంది. దాంతో చెవి దురద, చెవినొప్పి , అడ్డంకులు ఏర్పడే ప్రమాదం ఉంది. చెవిని తాకినప్పుడు నీటి బుడగలు ప్రభావం వల్ల టిమ్పానిక్ పొర కు ఇబ్బంది కలిగి చెవిపోటు కలగటానికి కారణమవుతుంది. తీవ్రమైన సందర్భాల్లో, చెవిపోటు, వినికిడి లోపం ఏర్పడే ప్రమాదం కూడా ఉంది. హోలీ రంగుల్లో పాదరసం ఉంటుంది. ఇది మూత్రపిండాలు, కాలేయం మరియు పుట్టబోయే పిల్లల ఆరోగ్యం వంటి అంతర్గత అవయవాలను ప్రభావితం చేస్తుంది. సింథటిక్ రసాయన రంగులు దృష్టిని ప్రతికూలంగా ప్రభావితం చేస్తాయని నిపుణులు అంటున్నారు. అలాగే కంటికి సరైన జాగ్రత్తలు తీసుకోకపోవడం వల్ల ఇన్ఫెక్షన్లు, అలర్జీలు వస్తాయని నిపుణులు అభిప్రాయపడుతున్నారు
