DCP : రోడ్డు ప్రమాదంలో ముంబై డీసీపీ మృతి

DCP : తెలంగాణలో జరిగిన ఒక ఘోర రోడ్డు ప్రమాదంలో ముంబై డిప్యూటీ కమిషనర్ ఆఫ్ పోలీస్ (DCP) సుధాకర్ పఠారే శనివారం మరణించారు. శ్రీశైలం -హైదరాబాద్ జాతీయ రహదారిలోని ఘాట్ రోడ్డులో నాగర్ కర్నూల్ జిల్లాలోని నల్లమల అటవీ ప్రాంతంలోని దోమలపెంట గ్రామం సమీపంలో ఈ ప్రమాదం జరిగింది. డిసిపి పఠారే తన సహోద్యోగి భగవత్‌తో కలిసి ఇన్నోవా కారులో ప్రయాణిస్తుండగా, వారి వాహనం ఆర్టీసీ బస్సును ఢీకొట్టింది. ఈ ప్రమాదంలో ఇన్నోవా కారు పూర్తిగా ధ్వంసం కాగా, కారులో ఉన్న ఇద్దరు వ్యక్తులు అక్కడికక్కడే మరణించారు. సమాచారం అందుకున్న పోలీసులు సంఘటనా స్థలానికి చేరుకుని ప్రమాదాన్ని పరిశీలించారు. మృతుడిని మహారాష్ట్రకు చెందిన పోలీసు అధికారిగా గుర్తించారు. మృతదేహాలను పోస్ట్‌మార్టం కోసం కల్వకుర్తి ప్రభుత్వ ఆసుపత్రికి తరలించారు.