– ప్రజల్లోకి బలంగా వెళ్లిన పేరు
– పీసీసీ చీఫ్పై తీవ్ర ఆరోపణలు
– సొంతపార్టీ నుంచే అధిష్ఠానానికి ఫిర్యాదులు
– పారాచూట్ లీడర్లకు టికెట్ల రావడంతో అసంతృప్తి
– టికెట్లు అమ్ముకున్నారని రేవంత్పై ఆరోపణలు
– సీట్ల వ్యవహారంపై ఆరాతీసిన అగ్రనేత రాహుల్
– హైకమాండ్ కు తలనొప్పిగా మారిన టికెట్ల పంపిణీ
– బీఆర్ఎస్కు ఆయుధంగా మారిన వ్యవహారం
ఇదేనిజం, తెలంగాణ బ్యూరో: పీసీసీ చీఫ్ రేవంత్ రెడ్డి కాంగ్రెస్ పార్టీ టికెట్లను అమ్ముకుంటున్నారని ఇటీవల జోరుగా ప్రచారం సాగుతున్న విషయం తెలిసిందే. సొంత పార్టీ లీడర్లే టికెట్ల వ్యవహారంపై ఆరోపణలు గుప్పిస్తున్నారు. ఇక ఐటీ మంత్రి కేటీఆర్.. పీసీసీ చీఫ్ రేవంత్రెడ్డిని ఉద్దేశించి రేటెంత రెడ్డి అంటూ సంబోధించారు. ఈ పేరు జనంలోకి బలంగా వెళ్లిపోయింది. మరోవైపు కాంగ్రెస్ శిబిరంలోనూ ఇదే తరహా ఆరోపణలు వస్తుండటం గమనార్హం. కాంగ్రెస్ పార్టీకి చెందిన సీనియర్ లీడర్లు .. ఢిల్లీకి వెళ్లి రేవంత్ పై ఫిర్యాదులు చేసినట్టు సమాచారం. మహేశ్వరం టికెట్ ను అమ్ముకున్నారని రూ. 10 కోట్లు, ఐదెకరాల భూమి తీసుకున్నారని కాంగ్రెస్ నేత కొత్త మనోహర్ రెడ్డి ఆరోపించారు. అప్పటి నుంచీ ఈ ఆరోపణల పర్వం కొనసాగుతూనే ఉంది. ఇక ఫస్ట్ లిస్ట్ ప్రకటించాక చాలా మంది అభ్యర్థులు టికెట్లు అమ్ముకున్నారని ఆరోపణలు గుప్పించారు. ఉప్పల్ టికెట్ ఆశించిన రాగిడి లక్ష్మారెడ్డి సైతం ఫస్ట్ లిస్ట్ లో పేరు దక్కకపోవడంతో కన్నీరు పెట్టుకున్నారు. రేవంత్ పైనే ఆరోపణలు గుప్పించారు. ఇక రేవంత్ కు అత్యంత సన్నిహితుడిగా గుర్తింపు పొందిన సోమశేఖర్ రెడ్డి సైతం రేవంత్ టికెట్లు అమ్ముకున్నారని ఆరోపించడం గమనార్హం.
అధిష్ఠానానికి సీనియర్ లీడర్ల క్యూ
ఇక సీనియర్ కాంగ్రెస్ సీనియర్ లీడర్లు సైతం కాంగ్రెస్ హైకమాండ్ వద్దకు క్యూ కట్టినట్టు సమాచారం. వారంతా టికెట్లు అమ్ముకున్నారన్న ఆరోపణలనే ప్రధానంగా తెరమీదకు తీసుకొచ్చారు. దీంతో ఓ దశలో కాంగ్రెస్ పరిశీలకులు, అధిష్ఠానం పెద్దలు ఆశ్చర్యపోయినట్టు సమాచారం. కాంగ్రెస్ పార్టీ టికెట్ల కోసం వచ్చిన దరఖాస్తుల కంటే .. రేవంత్ పై వచ్చిన ఫిర్యాదుల సంఖ్యే ఎక్కువుందని వారు వ్యాఖ్యానించారట. ఇక టికెట్ల కేటాయింపులో తమకు న్యాయం చేయలేదని బీసీ లీడర్లు, ఉద్యమకారులు సైతం ఢిల్లీలో రేవంత్ రెడ్డినే టార్గెట్ చేసి ఫిర్యాదు చేశారు. అయితే ఓ దశలో కాంగ్రెస్ హైకమాండ్ సైతం రేవంత్ విషయంపై అసహనం వ్యక్తం చేసినట్టు సమాచారం. ఈ స్థాయిలో రేవంత్ మీద ఎందుకు ఆరోపణలు రావడం పట్ల అధిష్ఠానం ఆగ్రహంగా ఉన్నట్టు టాక్.
రేవంత్కు చెక్ పెట్టేందుకే రాజగోపాల్ రెడ్డికి గ్రీన్ సిగ్నల్ ఇచ్చారా?
కోమటిరెడ్డి రాజగోపాల్ రెడ్డి మళ్లీ సొంతగూటికి చేర్చుకున్నారు. రాజగోపాల్ కాంగ్రెస్ పార్టీని వీడినప్పుడు.. సొంత పార్టీపై తీవ్ర స్థాయిలో విమర్శలు గుప్పించారు. రేవంత్రెడ్డిపై వ్యక్తిగత ఆరోపణలు చేశారు. ఇక రేవంత్ సైతం అదే స్థాయిలో విమర్శలు గుప్పించారు. అయితే తాజాగా రాజగోపాల్ రెడ్డిని కాంగ్రెస్ పార్టీలో చేరబోతున్నారు. రేవంత్ రాజగోపాల్ రాకను తీవ్రంగా వ్యతిరేకించినప్పటికీ హైకమాండ్ మాత్రం ఆయన వైపే మొగ్గు చూపినట్టు సమాచారం. రేవంత్ కు చెక్ పెట్టేందుకు రాజగోపాల్ రెడ్డిని తిరిగి చేర్చుకున్నట్టు టాక్.
ఈడీకి ఫిర్యాదులు
ఇటీవల రేవంత్ రెడ్డి తీరుపై తీవ్ర ఆరోపణలు వచ్చాయి. మొదటి లిస్ట్ రావడంతోనే ఈ స్థాయిలో విమర్శలు వస్తే .. రెండో లిస్ట్ వస్తే ఇంకా ఎన్ని ఆరోపణలు వస్తాయని కాంగ్రెస్ హైకమాండ్ భావిస్తోంది. గద్వాల జిల్లాకు చెందిన కురువ విజయ్ కుమార్ పీసీసీ చీఫ్ రేవంత్రెడ్డి టికెట్లు అమ్ముకుంటున్నారని నేరుగా ఈడీకి ఫిర్యాదు చేశారు. టికెట్లు అమ్ముకుంటున్నారన్న ఆరోపణలు రేవంత్ అనుచరులకు సైతం తలనొప్పిగా మారాయి. సొంత పార్టీలోనే రేవంత్ రెడ్డిపై ఆరోపణలు వస్తుండటంతో హైకమాండ్ కు కూడా ఈ వ్యవహారం చిక్కుముడిగా మారింది. పీసీసీ చీఫ్ను ఇప్పటికిప్పుడు మారిస్తే పార్టీ నష్టపోతుందని భావిస్తూ అధ్యక్ష మార్పు వ్యవహారాన్ని పెండింగ్ లో ఉంచినట్టు తెలుస్తోంది. ఇటీవల బీజేపీ రాష్ట్ర అధ్యక్షుడిని మార్చడంతో తెలంగాణలో తీవ్రంగా నష్టపోయింది. దీంతో కాంగ్రెస్ ఈ అంశాన్ని పెండింగ్ లో ఉంచినట్టు టాక్.
30 స్థానాల్లో పారాచూట్ లీడర్లకు టికెట్లు
కాంగ్రెస్ పార్టీ మొత్తం 30 స్థానాలపై తీవ్ర స్థాయిలో ఆరోపణలు వస్తున్నాయి. ఇక్కడ పారాచూట్ లీడర్లకే టికెట్లు ఇవ్వబోతున్నట్టు సమాచారం. దీంతో వీరి దగ్గర రేవంత్ రెడ్డి డబ్బు తీసుకొని.. వారికి అనుకూలంగా సర్వే రిపోర్టులు ఇప్పిస్తున్నారన్న ఆరోపణలు ఉన్నాయి. ఎప్పటికప్పుడు రీ సర్వేలు, ప్లాష్ సర్వేలు చేయిస్తుండటంపై కూడా చాలా డౌట్స్ వస్తున్నాయి. మరి రెండో లిస్ట్ వచ్చిన తర్వాత కాంగ్రెస్ పార్టీలో ఇంకెంత చిచ్చు రేగుతుందో? ఇంకా ఎంతమంది లీడర్లు ఆరోపణలు చేస్తారో? వేచి చూడాలి.
