– బీజేపీతో కలిసిపోవడానికి సిగ్గులేదా? అని కొండా ఫైర్
– బీఆర్ఎస్ అభ్యర్థి నన్నపునేనికి కొండా సురేఖ వార్నింగ్
ఇదేనిజం, వరంగల్ ప్రతినిధి : వరంగల్ తూర్పు నియోజకవర్గ బీఆర్ఎస్ అభ్యర్థి నన్నపునేని నరేందర్‌కు కాంగ్రెస్ పార్టీ అభ్యర్థి కొండా సురేఖ వార్నింగ్ ఇచ్చారు. నరేందర్ కారులో వెళ్తుండగా ఆపి మరీ ఆయనను హెచ్చరించారు. కాంగ్రెస్ పార్టీని దెబ్బతీసేందుకు బీజేపీతో కలిసి కుట్ర చేయడం మానుకోవాలని ఆగ్రహం వ్యక్తం చేశారు. కాంగ్రెస్ పార్టీ కార్యకర్తలను బెదిరిస్తే ఊరుకునేది లేదని మండిపడ్డారు. దీంతో అక్కడ ఉద్రిక్త పరిస్థితులు నెలకొన్నాయి. గురువారం వరంగల్ పెరుకవాడ ప్రభుత్వ పాఠశాల పోలింగ్ కేంద్రం వద్ద పోలీసుల దాడిలో గాయపడిన కార్యకర్తలను కొండా సురేఖ ఆమె కుమార్తె సుస్మిత పటేల్‌తో కలిసి పరామర్శించారు. ఈ సందర్భంగా ఈ ఘటన చోటుచేసుకుంది. నన్నపునేని దగ్గరికెళ్లిన సురేఖ ‘ఎర్రబెల్లి దయాకర్‌రావు, ప్రదీప్‌రావు కలిసిపోవడానికి సిగ్గులేదా? నిన్ను ఈ స్థాయికి ఎవరు తీసుకొచ్చారో తెల్వదా?’ అని ప్రశ్నించారు. ఈ సమయంలో పక్కనే ఉన్న బీఆర్ఎస్ కార్యకర్త సురేఖతో వాదనకు దిగుతూ చేయిలేపగా, ఆ వెంటనే కాంగ్రెస్ కార్యకర్తలు కూడా అదే పనిచేశారు. దీంతో సురేఖ మళ్లీ మాట్లాడుతూ ‘చెప్పు తెగుద్ది. భయపెట్టుడు, బెదిరించుడు చేస్తే ఒళ్లు పికులుద్ది.’అని స్ట్రాంగ్ వార్నింగ్ ఇచ్చారు. బీఆర్ఎస్ అభ్యర్థి నన్నపునేని నరేందర్ పోలీస్ కమిషనర్‌కు ఫిర్యాదు చేస్తానంటూ అక్కడి నుంచి వెళ్లిపోయారు.
