ఇందిరమ్మ ఇళ్ల పథకం పథకం… వాళ్ళకి డబ్బులు ఇవ్వరు!

తెలంగాణలో రేవంత్ రెడ్డి నేతృత్వంలోని కాంగ్రెస్ ప్రభుత్వం పేదల సొంత ఇంటి కలను నెరవేర్చేందుకు ఇందిరమ్మ ఇళ్ల పథకాన్ని ప్రతిష్టాత్మకంగా చేపట్టింది. ఈ పథకం కింద సొంత స్థలం ఉన్న నిరుపేదలకు రూ.5 లక్షల ఆర్థిక సాయం అందించి, వారి ఇంటి నిర్మాణాన్ని ప్రోత్సహిస్తోంది. అయితే, ఈ సాయం పొందేందుకు లబ్ధిదారులు తప్పనిసరిగా 600 చదరపు అడుగుల లోపు విస్తీర్ణంలో ఇంటిని నిర్మించాలని తెలంగాణ హౌసింగ్ కార్పొరేషన్ మేనేజింగ్ డైరెక్టర్ గౌతమ్ స్పష్టం చేశారు.

రాష్ట్రవ్యాప్తంగా ఇప్పటివరకు 2,832 మంది లబ్ధిదారులు తమ ఇళ్ల నిర్మాణంలో బేస్మెంట్ దశను పూర్తి చేసుకున్నారు. అయితే, హౌసింగ్ కార్పొరేషన్ అధికారులు నిర్వహించిన తనిఖీల్లో 285 మంది లబ్ధిదారులు 600 చదరపు అడుగుల కంటే ఎక్కువ విస్తీర్ణంలో ఇంటి నిర్మాణం చేపట్టినట్లు తేలింది. ఈ నిబంధన ఉల్లంఘన కారణంగా వీరికి ప్రభుత్వం నుంచి ఆర్థిక సాయం అందడంలో ఇబ్బందులు ఎదురవుతున్నాయి.

ఈ సందర్భంగా గౌతమ్ మాట్లాడుతూ, “ఇందిరమ్మ ఇళ్ల పథకం కింద లబ్ధిదారులు 400 నుంచి 600 చదరపు అడుగుల మధ్యలో ఇంటిని నిర్మించుకోవాలి. ఈ నిబంధనలు అర్హులైన నిరుపేదలకు సమర్థవంతమైన గృహాలను అందించడంలో కీలకం. అయితే, కొంతమంది సరైన అవగాహన లేకపోవడం వల్ల ఎక్కువ విస్తీర్ణంలో నిర్మాణాలు చేపట్టారు, దీంతో వారికి సాయం అందడంలో అడ్డంకులు ఏర్పడ్డాయి,” అని వివరించారు.