Iran : : పశ్చిమాసియాలో ఉద్రిక్తతలు మరోసారి ఆకాశాన్ని తాకాయి. ఇరాన్‌లోని మూడు కీలక అణు కేంద్రాలపై అమెరికా దాడులు జరిపినట్లు అధికారికంగా ధ్రువీకరించబడింది. ఈ దాడుల నేపథ్యంలో ఇజ్రాయెల్ దేశం హై అలర్ట్‌పై ఉంది. విద్యా సంస్థలు, కార్యాలయాలు మూసివేయబడ్డాయి, సభలు, సమావేశాలపై నిషేధం విధించబడింది. ఇజ్రాయెల్ డిఫెన్స్ ఫోర్సెస్ (IDF) దేశవ్యాప్తంగా అత్యవసర చర్యలను అమలు చేస్తోంది.
అమెరికా యుద్ధ విమానాలు ఇరాన్‌లోని ఫోర్డో, నతాంజ్, ఇస్ఫహాన్‌లో ఉన్న అణు కేంద్రాలపై శనివారం అర్ధరాత్రి దాడులు జరిపాయి. ఈ దాడుల్లో ఫోర్డోలోని యురేనియం శుద్ధి కేంద్రం ఒక భాగం పూర్తిగా ధ్వంసమైందని, నతాంజ్, ఇస్ఫహాన్‌లోని సౌకర్యాలకు తీవ్ర నష్టం జరిగినట్లు ఇరాన్ అధికారులు వెల్లడించారు. అమెరికా అధ్యక్షుడు డొనాల్డ్ ట్రంప్ ఈ దాడులను ప్రకటిస్తూ, ఇరాన్ అణు కార్యక్రమం ప్రపంచ శాంతికి ముప్పుగా మారిందని, దానిని అడ్డుకోవడమే తమ లక్ష్యమని పేర్కొన్నారు.
ఇరాన్ మాత్రం తమ అణు కార్యక్రమం శాంతియుత ప్రయోజనాల కోసమేనని, విద్యుత్ ఉత్పత్తి వంటి అవసరాల కోసం నిర్వహిస్తున్నామని స్పష్టీకరించింది. అయితే, అంతర్జాతీయ అణు శక్తి సంస్థ (IAEA) నివేదికలు ఇరాన్ అణు కార్యక్రమం సైనిక లక్ష్యాల వైపు సాగుతోందని సూచిస్తున్నాయని ఇజ్రాయెల్, అమెరికా ఆరోపిస్తున్నాయి. అమెరికా దాడులకు ప్రతీకారంగా ఇరాన్ ప్రతిదాడులు చేయవచ్చనే భయంతో ఇజ్రాయెల్ హై అలర్ట్‌పై ఉంది. ఇరాన్ ఇప్పటికే ఇజ్రాయెల్‌లోని అమెరికా దౌత్య కార్యాలయంపై క్షిపణి దాడి జరిపింది, దీంతో టెల్ అవీవ్‌లోని కార్యాలయం స్వల్పంగా దెబ్బతిన్నది. ఈ ఘటనతో ఇజ్రాయెల్‌లో భయాందోళనలు నెలకొన్నాయి.
ఇజ్రాయెల్ డిఫెన్స్ ఫోర్సెస్ దేశవ్యాప్తంగా భద్రతా చర్యలను కట్టుదిట్టం చేసింది. విద్యా సంస్థలు, ప్రభుత్వ కార్యాలయాలు తాత్కాలికంగా మూసివేయబడ్డాయి. ప్రజలు గుండెల్లో గుబులుతో ఉన్నారు. సభలు, సమావేశాలు, బహిరంగ కార్యక్రమాలపై నిషేధం విధించబడింది. టెల్ అవీవ్, జెరూసలం, హైఫా వంటి ప్రధాన నగరాల్లో భద్రతా దళాలు అప్రమత్తంగా ఉన్నాయి. ఇరాన్ క్షిపణులు ఇజ్రాయెల్‌లోని విద్యుత్ గ్రిడ్‌ను దెబ్బతీశాయని, దీంతో కొన్ని ప్రాంతాల్లో విద్యుత్ సరఫరా నిలిచిపోయినట్లు సమాచారం. ఇరాన్ ఈ దాడులను తీవ్రంగా ఖండించింది. ఇస్ఫహాన్ ప్రావిన్స్ డిప్యూటీ గవర్నర్ అక్బర్ సలేహీ, అమెరికా దాడుల వల్ల తీవ్ర నష్టం జరిగిందని, ఇరాన్ సైన్యం ప్రతిస్పందనకు సిద్ధమవుతోందని హెచ్చరించారు. ఇరాన్ వాయుసేన, ఎయిర్ డిఫెన్స్ విభాగాలు అప్రమత్తంగా ఉన్నాయి. ఇరాన్ సాయుధ బలగాల ప్రతినిధి అబొల్‌ఫజల్ షెక్రాచి, అమెరికా, ఇజ్రాయెల్ ఈ దాడులకు భారీ మూల్యం చెల్లించాల్సి ఉంటుందని హెచ్చరించారు.
JOIN FOR REGULAR UPDATES
