ఇదే నిజం, తెలంగాణ బ్యూరో: ఢిల్లీ లిక్కర్ పాలసీ కేసులో అరెస్ట్ అయ్యి తీహార్ జైలులో ఉన్న బీఆర్ఎస్ ఎమ్మెల్సీ కవితకు కోర్టులో తీవ్ర నిరాశ ఎదురైంది. జూలై 31తో కవిత జ్యుడీషియల్ రిమాండ్ ముగియడంతో వర్చువల్ గా ఈడీ అధికారులు కవితను కోర్టులో ప్రవేశపెట్టారు. ఢిల్లీలోని హౌస్ అవెన్యూ కోర్టు ఎమ్మెల్సీ కవిత జ్యూడీషియల్ రిమాండ్ను ఆగస్టు 13 వరకు పొడిగిస్తూ ఉత్తర్వులు జారీ చేసింది. కోర్టు ఇప్పటికే పలుమార్లు కవిత బెయిల్ పిటిషన్లను తిరస్కరించింది. కేసు విచారణ కీలక దశలో ఉన్నందున కవిత రిమాండ్ పొడిగించాలని ఈడీ కోర్టును అభ్యర్థించింది. ఈడీ వాదనలతో ఏకీభవించిన కోర్టు రిమాండ్ను 14 రోజుల పాటు పొడిగిస్తూ తీర్పిచ్చింది.
లిక్కర్ పాలసీలో సీబీఐ కేసులో ఎమ్మెల్సీ కవిత ఏ17 గా ఉన్నారు. సీబీఐ ఈ ఛార్జ్ షీట్ పై మరోసారి విచారణను ఆగస్టు 9వ తేదీకి వాయిదా వేసింది. ఒక వైపు ఈడీ, సీబీఐ మూకుమ్మడి దాడులు, మరో వైపు బెయిల్ దొరక్కపోవడంతో కవిత తీవ్ర నిరాశలో ఉన్నట్లు సమాచారం. అంతే కాకుండా ఆమె ఇటీవల అనారోగ్య సమస్యలు ఎదుర్కొంటున్నట్లు వార్తలు రావడంతో కవిత కుటుంబ సభ్యులు, బీఆర్ఎస్ నేతలు ఆందోళనకు గురవుతున్నారు. ఈ కేసులో కవిత మార్చి 16న అరెస్ట్ కాగా.. నాలుగు నెలల నుంచి ఆమె తీహార్ జైలులోనే ఉన్నారు.
