కాంగ్రెస్ పార్టీపై ప్రధాని నరేంద్ర మోదీ సంచలన వ్యాఖ్యలు

తెలంగాణలో రైతు రుణమాఫీపై ప్రధాని నరేంద్ర మోదీ సంచలన వ్యాఖ్యలు చేశారు. రైతుల రుణాలు మాఫీ చేస్తామని చెప్పి అధికారంలోకి వచ్చిన కాంగ్రెస్ పార్టీ ఇన్ని రోజులు గడిచినా మాఫీ చేయలేదని విమర్శించారు. రుణమాఫీ ఎందుకు జరగడం లేదని అక్కడి రైతులు ప్రభుత్వాన్ని ప్రశ్నిస్తున్నారు. ఈ విషయాన్ని మహారాష్ట్ర ప్రజలు మర్చిపోకూడదు. శనివారం మహారాష్ట్రలో పర్యటించిన ప్రధాని నరేంద్ర మోదీ పలు అభివృద్ధి కార్యక్రమాలను ప్రారంభించారు. ఈ సందర్భంగా వాసింలో ఏర్పాటు చేసిన సభలో ఆయన ప్రసంగించారు. కాంగ్రెస్‌, ఇండియా కూటమిని ఆయన విమర్శించారు. కర్ణాటకలో కాంగ్రెస్ ప్రభుత్వం ఏర్పడిందని, గత బీజేపీ ప్రభుత్వం రైతులకు అందజేస్తున్న ఆర్థికసాయాన్ని అక్కడితో నిలిపివేసిందని ధ్వజమెత్తారు. ఇటీవల ఢిల్లీలో రూ.వేల కోట్ల విలువైన డ్రగ్స్ పట్టివేత కేసులో ఓ కాంగ్రెస్ నేత ప్రమేయం ఉన్నట్లు ఆరోపణలు వచ్చాయి. డ్రగ్స్ సొమ్ముతో కాంగ్రెస్ పార్టీ ఎన్నికల్లో పోటీ చేస్తోందని ప్రధాని మోదీ విమర్శించారు.