Saif Ali Khan : బాలీవుడ్ స్టార్ నటుడు సైఫ్ అలీ ఖాన్‌కు మధ్యప్రదేశ్ హైకోర్టులో గట్టి షాక్ తగిలింది. భోపాల్‌లోని తన పూర్వీకులకు చెందిన సుమారు రూ.15,000 కోట్ల విలువైన ఆస్తుల వివాదంలో ఆయనకు వ్యతిరేకంగా తీర్పు వెలువడింది. ఈ ఆస్తులను ‘ఎనిమీ ఆస్తి’ గా పరిగణిస్తూ కేంద్ర ప్రభుత్వం తీసుకున్న నిర్ణయాన్ని సవాలు చేస్తూ సైఫ్ కుటుంబం దాఖలు చేసిన పిటిషన్‌ను హైకోర్టు కొట్టివేసింది. అంతేకాదు ఈ కేసును మళ్లీ విచారించి ఏడాదిలోపు పూర్తి నివేదిక సమర్పించాలని ట్రయల్ కోర్టును ఆదేశించింది.
ఈ వివాదం భోపాల్ చివరి నవాబు హమీదుల్లా ఖాన్‌కు చెందిన ఆస్తుల చుట్టూ తిరుగుతోంది. హమీదుల్లా ఖాన్‌కు ఇద్దరు కుమార్తెలు—పెద్ద కుమార్తె అబిదా సుల్తాన్ మరియు రెండవ కుమార్తె సాజిదా సుల్తాన్. అబిదా సుల్తాన్ 1950లో దేశ విభజన సమయంలో పాకిస్తాన్‌కు వలస వెళ్లి అక్కడి పౌరసత్వం స్వీకరించారు. దీంతో, 1968లోని ‘ఎనిమీ ఆస్తుల చట్టం’ (Enemy Property Act) ప్రకారం ఆమెకు చెందిన ఆస్తులను కేంద్ర ప్రభుత్వం ‘ఎనిమీ ఆస్తి’గా వర్గీకరించింది. ఈ చట్టం ప్రకారం ఎనిమీ దేశాల పౌరసత్వం స్వీకరించిన వారి ఆస్తులు ప్రభుత్వం నియంత్రణలోకి వస్తాయి. సాజిదా సుల్తాన్ మాత్రం భారతదేశంలోనే ఉండి, పటౌడీ నవాబు ఇఫ్తికార్ అలీ ఖాన్‌ను వివాహం చేసుకున్నారు. సాజిదా సైఫ్ అలీ ఖాన్‌కు నాయనమ్మ (తల్లి తరపు అమ్మమ్మ) అవుతారు. సాజిదా ద్వారా వారసత్వంగా వచ్చిన ఆస్తులు సైఫ్ కుటుంబానికి చెందుతాయని, అబిదా పాకిస్తాన్‌కు వెళ్లినందున ఆమె వాటా వారికి రాదని సైఫ్ కుటుంబం వాదిస్తోంది.
వివాదంలో ఉన్న ఆస్తుల్లో భోపాల్, రైసేన్ ప్రాంతాల్లో విస్తారమైన భూములు, నూర్-ఉస్-సబా ప్యాలెస్, ఫ్లాగ్ స్టాఫ్ హౌస్, అహ్మదాబాద్ ప్యాలెస్, కోహెఫిజా ఫ్లాగ్ హౌస్, కోఠి, దార్-ఉస్-సలాం వంటి చారిత్రక, విలువైన భవనాలు ఉన్నాయి. ఈ ఆస్తుల మొత్తం విలువ సుమారు రూ.15,000 కోట్లకు పైగా ఉంటుందని అంచనా వేశారు.
2014లో కస్టోడియన్ ఆఫ్ ఎనిమీ ప్రాపర్టీ డిపార్ట్‌మెంట్ ఈ ఆస్తులను ‘ఎనిమీ ఆస్తి’గా ప్రకటించింది. దీన్ని సవాలు చేస్తూ సైఫ్ అలీ ఖాన్, ఆయన తల్లి షర్మిలా టాగోర్, సోదరీమణులు సబా మరియు సోహా అలీ ఖాన్‌లు 2015లో మధ్యప్రదేశ్ హైకోర్టులో పిటిషన్ దాఖలు చేశారు. అయితే, 2000లో ట్రయల్ కోర్టు సైఫ్ కుటుంబాన్ని వారసులుగా గుర్తించిన ఉత్తర్వులను హైకోర్టు రద్దు చేసింది. ఈ ఆస్తులను ‘ఎనిమీ ఆస్తి’గా పరిగణించే కేంద్ర ప్రభుత్వ నిర్ణయాన్ని సమర్థిస్తూ, కేసును మళ్లీ విచారించాలని ఆదేశించింది.
సైఫ్ కుటుంబం వాదన ప్రకారం.. భోపాల్ సంస్థానం 1949లో భారత యూనియన్‌లో విలీనమైనప్పుడు, నవాబు హమీదుల్లా ఖాన్‌కు చెందిన వ్యక్తిగత ఆస్తులు మరియు వారసత్వ హక్కులు భోపాల్ సింహాసన వారసత్వ చట్టం, 1947 కింద కొనసాగుతాయని ఒప్పందంలో పేర్కొన్నారు. హమీదుల్లా ఖాన్ 1960లో మరణించిన తర్వాత, సాజిదా సుల్తాన్ నవాబుగా ప్రకటించబడ్డారు, కాబట్టి ఆస్తులు ఆమె వారసులైన సైఫ్ కుటుంబానికి చెందుతాయని వారు పేర్కొన్నారు. తాజా తీర్పుతో.. సైఫ్ అలీ ఖాన్ కుటుంబం ఈ ఆస్తులపై హక్కును కోల్పోయే అవకాశం ఉంది. ఈ ఆస్తులు ప్రభుత్వ నియంత్రణలోకి వెళ్లే మార్గం సుగమమైంది. సోషల్ మీడియాలో ఈ తీర్పు గురించి విస్తృతంగా చర్చ జరుగుతోంది, సైఫ్ వేల కోట్ల ఆస్తులు కోల్పోయాడని పోస్టులు వైరల్ అవుతున్నాయి.
JOIN FOR REGULAR UPDATES
