Secunderabad Railway Station: రైల్వే ప్రయాణికులకు అలర్ట్.. సికింద్రాబాద్ రైల్వే ప్లాట్‌ఫామ్స్ క్లోజ్..!

Secunderabad Railway Station: సికింద్రాబాద్ రైల్వే స్టేషన్ ఆధునీకరణ పనుల్లో భాగంగా ఆరు ప్లాట్‌ఫామ్‌లను మూసివేస్తున్నట్లు దక్షిణ మధ్య రైల్వే అధికారులు ప్రకటించారు. ఈ మూసివేత 100 రోజుల పాటు కొనసాగుతుంది, దీనితో దాదాపు 120 రైళ్లను కాచిగూడ, చర్లపల్లి, నాంపల్లి స్టేషన్లకు మళ్లిస్తున్నారు. రూ. 720 కోట్లతో జరుగుతున్న ఈ పునర్నిర్మాణంలో అంతర్జాతీయ విమానాశ్రయాల స్థాయిలో సౌకర్యాలు కల్పించేందుకు ప్రణాళికలు సిద్ధం చేశారు. 108 మీటర్ల వెడల్పు, 120 మీటర్ల పొడవుతో నిర్మించే రెండు అంతస్తుల స్కై కాంకోర్స్ ఒక ముఖ్య ఆకర్షణగా ఉంటుంది, దీనిలో మొదటి అంతస్తు ప్రయాణికుల కదలిక కోసం, రెండో అంతస్తు రిటైల్ ఔట్‌లెట్స్, కియోస్కులు, రెస్టారెంట్లు, వినోద సౌకర్యాలతో రూఫ్‌టాప్ ప్లాజాగా ఉంటుంది.

అలాగే, 26 లిఫ్ట్‌లు, 32 ఎస్కలేటర్లు, 2 ట్రావెలేటర్లు, ఫుట్‌ఓవర్ బ్రిడ్జిలు నిర్మించి ప్రయాణికుల సౌలభ్యాన్ని మెరుగుపరుస్తారు. మల్టీ-లెవల్, అండర్‌గ్రౌండ్ పార్కింగ్, 5,000 కిలోవాట్ సోలార్ పవర్ ప్లాంట్‌తో పర్యావరణ హిత రీతిలో స్టేషన్‌ను తీర్చిదిద్దుతున్నారు. ఈ పనుల వల్ల స్టేషన్ సామర్థ్యం పెరగడమే కాక, తూర్పు, పశ్చిమ మెట్రో స్టేషన్లు, రథిఫైల్ బస్టాండ్‌తో అనుసంధానం మెరుగవుతుంది. ఈ ప్రాజెక్టు 2025 చివరి నాటికి పూర్తవుతుందని అధికారులు లక్ష్యంగా పెట్టుకున్నారు.