Shekhar Master : వివాదంలో శేఖర్ మాస్టర్.. వార్నింగ్ ఇచ్చిన మహిళా కమిషన్

Shekhar Master : టాలీవుడ్ లో ఇటీవలే వచ్చిన ”మిస్టర్ బచ్చన్”, ”డాకు మహారాజ్”, ”రాబిన్ హుడ్” సినిమాల్లోని పాటలు స్టెప్ లు వివాదాలకు దారి తీసాయి. అయితే ఈ పాటలు అన్నిటికి కొరియోగ్రఫీ చేసింది శేఖర్ మాస్టర్ (Shekhar Master) కావడం గమనర్హం. తాజాగా దీనిపై మహిళా కమిషన్ చైర్‌పర్సన్ నేరెళ్ల శారద స్పందించారు.
తెలంగాణ రాష్ట్ర మహిళా కమిషన్‌కు ఇటీవల కొన్ని సినిమా పాటల్లో ఉపయోగిస్తున్న డాన్స్ స్టెప్స్ అసభ్యంగా, మహిళలను కించపరిచే విధంగా ఉన్నాయని పలు ఫిర్యాదులు అందాయి అని ఆమె పేర్కొన్నారు. సినిమా అనేది సమాజంపై ప్రభావం చూపే శక్తివంతమైన మాధ్యమం కావడంతో, ఇందులో మహిళలను అవమానించే లేదా అసభ్యకరంగా చూపించే అంశాలు తీవ్ర ఆందోళనకు గురిచేస్తున్నాయి అని అన్నారు.
ఈ నేపథ్యంలో, సినిమా దర్శకులు, నిర్మాతలు, కొరియోగ్రాఫర్లు మరియు సంబంధిత వర్గాలు బాధ్యతాయుతంగా వ్యవహరించాలని మహిళా కమిషన్ హెచ్చరిస్తోంది అని తెలిపారు. మహిళలను తక్కువ చేసి చూపించే, అసభ్యకరమైన డాన్స్ స్టెప్స్‌ను వెంటనే నిలిపివేయాలి. ఈ హెచ్చరికను పాటించకపోతే, సంబంధిత చట్టాల ప్రకారం కఠిన చర్యలు తీసుకోవడానికి సిద్ధంగా ఉన్నాము అని వెల్లడించారు. సినిమా రంగం సమాజానికి సానుకూల సందేశాలను అందించడం, మహిళల గౌరవాన్ని కాపాడటం అనేది నైతిక బాధ్యత. యువత, పిల్లలపై సినిమాలు చూపించే ప్రభావాన్ని దృష్టిలో ఉంచుకొని, సినిమా పరిశ్రమ స్వీయ నియంత్రణ పాటించాల్సిన అవసరం ఉంది. ఈ అంశంపై ప్రజలు, సామాజిక సంస్థలు తమ అభిప్రాయాలను మహిళా కమిషన్‌కు తెలియజేయవచ్చు. ఈ విషయం పై నిశితంగా పరిశీలన కొనసాగిస్తూ, అవసరమైన మరిన్ని చర్యలు తీసుకుంటాం అని ఆమె పేర్కొన్నారు.