మేఘాలయ హనీమూన్ జంట మిస్సింగ్ కేసులో షాకింగ్ ట్విస్ట్.. ప్రియుడుతో కలిసి భార్యే పక్కా ప్లాన్ తో భర్త హత్య..!

మేఘాలయలో హనీమూన్ జంట మిస్సింగ్ కేసు దేశవ్యాప్తంగా తీవ్ర సంచలనం సృష్టించిన సంగతి తెలిసిందే. ఈ కేసులో భర్త హత్యకు భార్య సోనమ్ రఘువంశీ కుట్ర పన్నినట్లు పోలీసులు గుర్తించారు. సోనమ్‌ను అరెస్ట్ చేసిన పోలీసులు ఆమెను మేఘాలయ నుంచి పాట్నాకు, ఆ తర్వాత గౌహతికి తరలించారు. మంగళవారం మధ్యాహ్నం 12:55 గంటలకు పాట్నా నుంచి గౌహతికి విమానంలో తీసుకెళ్లి, అక్కడి నుంచి మేఘాలయలోని కోర్టులో హాజరుపరచనున్నట్లు పోలీసులు తెలిపారు.

హత్యకు కుట్ర..ప్రియుడితో కలిసి పథకం
ఇండోర్‌కు చెందిన ట్రాన్స్‌పోర్ట్ వ్యాపారి రాజా రఘువంశీతో సోనమ్ పెళ్లి మే 11, 2025న జరిగింది. పెళ్లైన ఐదో రోజు, అంటే మే 16న, సోనమ్ తన ప్రియుడు రాజ్ కుశ్వాహాతో కలిసి భర్త హత్యకు పథకం రచించింది. “రాజాను చంపేద్దాం, కిడ్నాప్ నాటకం ఆడిద్దాం. అప్పుడు నేను వితంతువుగా మారతాను, నాన్న కూడా మన పెళ్లికి అంగీకరిస్తారు,” అని సోనమ్ రాజ్‌తో చెప్పినట్లు పోలీసుల విచారణలో తేలింది. హత్యకు ఉపయోగించిన కత్తిని ఆన్‌లైన్‌లో ఆర్డర్ చేశారు. సంఘటనకు ముందు నిందితులు సోనమ్ ఉండే హోం స్టే నుంచి 1 కి.మీ దూరంలోని హోటల్‌లో బస చేశారు. లొకేషన్‌ను సోనమే వారికి పంపించింది.

ఫోటోషూట్ నెపంతో హత్య
మే 23న సోనమ్, రాజాను ఫోటోషూట్ నెపంతో ఒంటరి కొండ ప్రాంతానికి తీసుకెళ్లింది. సమయం చూసి “చంపేయండి” అని అరవడంతో, అక్కడే ఉన్న ముగ్గురు యువకులు—విశాల్ చౌహాన్, ఆకాశ్ రాజ్‌పుత్, మరో నిందితుడు—రాజాను కిరాతకంగా హత్య చేశారు. విశాల్ రాజా తలపై కత్తితో గాయపరిచాడు, ఆకాశ్ దూరంగా బైక్‌పై పరిస్థితిని గమనిస్తూ ఉన్నాడు. మొదట నిందితులు ఈ హత్యకు ఒప్పుకోలేదు, కానీ సోనమ్ రూ.20 లక్షలు ఇస్తానని ఆశ చూపడంతో అంగీకరించారు.

సోనమ్ పరారీ.. అరెస్ట్
హత్య తర్వాత సోనమ్ శిలాంగ్ నుంచి గౌహతికి, అక్కడి నుంచి ట్రైన్‌లో వారణాసి మీదుగా గాజీపూర్‌కు చేరుకుంది. దారిలో తన మొబైల్ ఫోన్‌లను ధ్వంసం చేసింది. అయితే, సీసీటీవీ ఫుటేజ్, ఫోన్ కాల్ డాటా, టూరిస్ట్ గైడ్ సమాచారం ఆధారంగా మేఘాలయ, మధ్యప్రదేశ్ పోలీసులు దర్యాప్తు చేపట్టారు. సీసీటీవీలో సోనమ్ నిందితులతో మాట్లాడుతున్న దృశ్యాలు బయటపడ్డాయి. రాజ్ కుశ్వాహాను అరెస్ట్ చేసిన తర్వాత, తన పథకం బయటపడిందని గ్రహించిన సోనమ్ ఉత్తరప్రదేశ్‌లోని ఓ ఢాబాలో లొంగిపోయింది. ఆమె తాను అమాయకురాలినని, తనను ఎవరో కిడ్నాప్ చేశారని వాదిస్తోంది.

రాజ్ కుశ్వాహా డ్రామా
హత్యకు కుట్ర పన్నిన రాజ్ కుశ్వాహా, రాజా అంత్యక్రియల్లో పాల్గొని భావోద్వేగంతో ఉన్నట్లు నటించాడు. మృతుడి మామ దవీ సింగ్‌ను ఓదారుస్తూ కనిపించాడు, ఇది వీడియోల్లో స్పష్టంగా రికార్డైంది.

పోలీసుల దర్యాప్తు
టూరిస్ట్ గైడ్, హోటల్ సీసీటీవీ ఫుటేజ్, ఫోన్ కాల్ డాటా ఆధారంగా పోలీసులు కేసును ఛేదించారు. సోనమ్, రాజ్ కుశ్వాహా, విశాల్ చౌహాన్, ఆకాశ్ రాజ్‌పుత్‌లను అరెస్ట్ చేసి విచారణ కొనసాగిస్తున్నారు. ఈ కేసు ప్రస్తుతం దేశవ్యాప్తంగా హాట్ టాపిక్‌గా మారింది.