Snake : ఇంట్లో పామును పెంచుకోవాలనుకుంటున్నారా..? ఇదే సరైన ఎంపిక..!

Snake : సాధారణంగా పాము అంటే భయం కలుగుతుంది. కానీ బాల్ పైథాన్ అనే ఈ పాము జాతి మాత్రం దీనికి పూర్తి భిన్నం. సాధు స్వభావం, ప్రశాంతమైన ప్రవర్తనతో ఇది ప్రపంచవ్యాప్తంగా పెంపుడు జంతువుగా ఆదరణ పొందుతోంది. పాములను పెంచుకోవాలనుకునే వారికి వారికి బాల్ పైథాన్ ఒక అద్భుతమైన ఎంపిక.
ఈ పాము పేరుకు కారణమే దాని ప్రత్యేకమైన ఆత్మరక్షణ విధానం. భయం కలిగినప్పుడు లేదా ప్రమాదంలో ఉన్నట్టు భావించినప్పుడు ఇది ఎదురుదాడి చేయదు. బదులుగా తన శరీరాన్ని గుండ్రంగా బంతిలా చుట్టుకొని, తలను మధ్యలో దాచేసుకుంటుంది. ఈ లక్షణం వల్లే దీనికి ‘బాల్ పైథాన్’ అనే పేరు వచ్చింది. దీని సౌమ్య స్వభావం కారణంగా పాములంటే భయపడే వారు కూడా దీనితో సౌకర్యంగా ఉండగలరు. బాల్ పైథాన్‌లు పరిమాణంలో మితంగా ఉంటాయి. సాధారణంగా 3 నుంచి 5 అడుగుల పొడవు మాత్రమే పెరుగుతాయి. వీటి నిర్వహణ చాలా సులభం. రోజూ ఆహారం ఇవ్వాల్సిన అవసరం లేదు. వయసును బట్టి వారానికి లేదా పదిహేను రోజులకు ఒకసారి ఆహారం ఇస్తే సరిపోతుంది.
బాల్ పైథాన్‌లు వివిధ రంగులు, చర్మపు డిజైన్‌లలో లభిస్తాయి, వీటిని ‘మార్ఫ్స్’ అంటారు. లేత రంగుల నుంచి ముదురు చారల వరకు ఎన్నో రకాలు అందుబాటులో ఉన్నాయి. సరైన వాతావరణం కల్పిస్తే ఇవి 20 నుంచి 30 సంవత్సరాల వరకు జీవిస్తాయి. ఈ క్రమంలో బాల్ పైథాన్ పెంపుడు జంతువుగా ప్రత్యేకమైన అనుభూతిని అందిస్తుంది.