– తాజాగా ఢిల్లీ ఎంపీ ఇంట్లో ముమ్మర సోదాలు
– ఇప్పటికే అప్రూవర్లుగా పలువురు నిందితులు
ఇదేనిజం, నేషనల్ బ్యూరో: లిక్కర్ స్కామ్ కేసులో ఈడీ మరోసారి దూకుడు పెంచింది. దీంతో ఈ కేసులో కవిత అరెస్ట్ కాబోతున్నదా? అన్న అనుమానాలు కలుగుతున్నాయి. తాజాగా ఆప్ ఎంపీ సంజయ్ సింగ్ ఇంట్లో ఈడీ తనిఖీలు చేపట్టింది. అయితే ఈ కేసుకు సంబంధించి ఇప్పటికే పలువురు నిందితులు అప్రూవర్లుగా మారారు. మరోవైపు ఈ కేసులో అరుణ్ రామచంద్ర పిళ్లై కూడా అప్రూవర్ గా మారినట్టు వార్తలు వచ్చాయి. ఆయన తొలుత అప్రూవర్ గా మారడం.. ఆ తర్వాత మళ్లీ తాను మారలేదని అధికారుల ఒత్తిడితోనే అప్రూవర్ గా మారినట్టు చెప్పుకొచ్చారు. ఇదిలా ఉంటే తాజాగా ఈ కేసులో కవితను కూడా అరెస్ట్ చేయబోతున్నట్టు ప్రచారం సాగుతోంది. ఈ కేసుకు సంబంధించి సౌత్ గ్రూప్ కు కీలకంగా వ్యవహరించిన ఎంపీ మాగుంట శ్రీనివాసులు రెడ్డి ఆయన కుమారుడు మాగుంట రాఘవ అప్రూవర్లుగా మారారు. కవితపై కూడా చర్యలు తీసుకోబోతున్నారన్న అంశం తాజాగా చర్చకు వస్తోంది. ప్రస్తుతం బీజేపీ, బీఆర్ఎస్ ఒక్కటేనని జోరుగా ప్రచారం సాగుతోంది. రెండు పార్టీల ఒప్పందంలో భాగంగానే కవితను అరెస్ట్ చేయడం లేదని కాంగ్రెస్ ప్రచారం చేస్తోంది. దీంతో తెలంగాణలో బీజేపీ తీవ్రంగా నష్టపోయింది. పలువురు నేతలు పార్టీని వీడేందుకు సైతం సిద్ధంగా ఉన్నారు. ఈ పరిస్థితుల్లో కవితను అరెస్ట్ చేస్తే రాజకీయంగా ప్రయోజనం ఉంటుందని బీజేపీ భావిస్తున్నట్టు సమాచారం. అందులో భాగంగానే కవిత అరెస్ట్ ఉంటుందని జోరుగా ప్రచారం సాగుతోంది. మరి ఈ వార్తల్లో నిజమెంతో వేచి చూడాలి.
