మార్ఫింగ్ వీడియో చిచ్చు.. రేవంత్​ మెడకు ఉచ్చు

ఇదేనిజం, తెలంగాణ: కేంద్రహోంమంత్రి అమిత్​ షా డీప్​ ఫేక్​ వీడియో దేశ వ్యాప్తంగా ప్రకంపనలు సృష్టించిన విషయం తెలిసిందే. అయితే వీడియో రూపకల్పన మొత్తం తెలంగాణ కాంగ్రెస్ సోషల్ మీడియా కేంద్రంగానే సాగినట్టు ఆరోపణలు ఉన్నాయి. ఇందుకు సంబంధించిన వీడియోను తెలంగాణ ముఖ్యమంత్రి, టీపీసీసీ చీఫ్​ రేవంత్​ రెడ్డి తన ఎక్స్​ ఖాతాలో పోస్ట్ చేసినట్టు ఆరోపణలు వినిపిస్తున్నాయి. ఈ నేపథ్యంలోనే సోమవారం ఢిల్లీ పోలీసులు నేరుగా సీఎం రేవంత్​ రెడ్డి సహా పలువురు తెలంగాణ కాంగ్రెస్​ నాయకులు, సోషల్ మీడియా విభాగానికి నోటీసులు అందజేశారు. నేరుగా గాంధీ భవన్​ కు చేరుకొని నోటీసులు ఇచ్చారు. కాగా ఈ కేసులో రేవంత్​ రెడ్డిని అరెస్ట్​ చేయబోతున్నారన్న వార్తలు వస్తున్నాయి. సోమవారం హైదరాబాద్‌లోని గాంధీభవన్‌కు చేరుకున్న పోలీసులు ముఖ్యమంత్రి, పీసీసీ అధ్యక్షుడి రేవంత్‌రెడ్డి, కాంగ్రెస్‌ అధికార ప్రతినిధి అస్లాం తస్మీన్‌, పార్టీ సోషల్‌ మీడియా ఇన్ చార్జ్​ మన్నె సతీశ్‌, ఆ పార్టీకి చెందిన నవీన్‌, శివకుమార్‌కు నోటీసులు ఇచ్చారు. మే 1న తన మొబైల్​ తీసుకొని విచారణకు హాజరు కావాలని ఢిల్లీ పోలీసులు రేవంత్​ కు చెప్పినట్టు సమాచారం. సీఆర్పీసీ 91 ప్రకారం ఢిల్లీలో పోలీసులు ఈ నోటీసులు ఇచ్చినట్ల తెలిసింది. సెక్షన్ 153/153A/465/469/171G కింద ఢిల్లీ స్పెషల్ సెల్ పోలీసులు కేసు నమోదు చేశారు.

వీడియోలో ఏం ఉంది?
అమిత్‌ షా ఈ నెల 23న సిద్దిపేట లో నిర్వహించిన విజయ సంకల్ప సభలో అమిత్​ షా మాట్లాడుతూ.. ముస్లిం రిజర్వేషన్లను రద్దు చేస్తామని.. వాటిని తిరిగి ఎస్సీ, ఎస్టీ, బీసీలకు ఇచ్చేస్తామని వ్యాఖ్యానించారు. అయితే ఈ వీడియోను కొంతమంది మార్ఫింగ్​ చేశారు. అమిత్​ షా ఎస్సీ, ఎస్టీ, బీసీలకు రిజర్వేషన్లు రద్దు చేస్తామని అన్నట్టు వీడియో క్రియేట్​ చేశారు. ఈ వీడియో సోషల్ మీడియాలో ఫుల్​ వైరల్​ అయ్యింది. దేశవ్యాప్తంగా ఈ అంశం సంచలనంగా మారింది. నేరుగా అమిత్​ షా, బీజేపీ పెద్దలు వివరణ ఇచ్చుకోవాల్సి వచ్చింది. దీంతో కేంద్రహోంశాఖ సీరియస్​ అయ్యింది. అమిత్​ షా మీద క్రియేట్​ చేసిన వీడియోపై ఫిర్యాదు చేసింది. కేసు నమోదు చేసిన ఢిల్లీ పోలీసులు దర్యాప్తు చేపట్టారు.

నోటీసులకు భయపడను
ఢిల్లీ పోలీసులు ఇచ్చిన నోటీసులపై సీఎం రేవంత్​ స్పందించారు. సోమవారం ఆయన కర్ణాటకలోని సేడం ఎన్నికల ప్రచార సభలో పాల్గొన్నారు. ఈ సందర్భంగా రేవంత్ రెడ్డి మాట్లాడుతూ.. బీజేపీ విధానాలను ప్రశ్నించినందుకు తనకు తెలంగాణ కాంగ్రెస్​ నేతలకు ఢిల్లీ ఢిల్లీ పోలీసులు నోటీసులు ఇస్తున్నారని విమర్శించారు. ఎన్నికలు వచ్చినప్పుడల్లా మోదీ ప్రభుత్వం ఈడీ, సీబీఐ, ఐటీ అధికారులను ఉసిగొల్పి ప్రత్యర్థి పార్టీల నేతలను వేధిస్తోందని విమర్శించారు. మోడీ విధానాలకు వ్యతిరేకంగా రాహుల్ గాంధీ ఎంతో పోరాటం చేస్తున్నారని.. ఈ పోరాటంలో కర్ణాటక నుంచి 25 ఎంపీలను గెలిపించి మోదీని గద్దె దించడానికి మీరు సహకరించాలని రేవంత్ రెడ్డి కోరారు. ‘ఎస్సీ, ఎస్టీ, ఓబీసీ రిజర్వేషన్లు రద్దు చేసేందుకే బీజేపీ 400 సీట్లు కావాలంటోంది. రిజర్వేషన్లు కావాలనుకుంటే కాంగ్రెస్ ను గెలిపించండి. ఈ ప్రాంతం నుంచి వచ్చిన ఖర్గే ఏఐసీసీ అధ్యక్షుడి స్థాయికి ఎదిగారు. మల్లికార్జున ఖర్గేకి మీరు మద్దతుగా నిలవాల్సిన బాధ్యత ఉంది.’ అంటూ రేవంత్​ ఆరోపించారు.