Trump – Musk : ట్రంప్ – ఎలాన్ మస్క్ మధ్య గొడవ.. 13 లక్షల కోట్లు నష్టం.. ఎలాన్ మస్క్ సంచలన నిర్ణయం..!!

Trump – Musk : అమెరికా అధ్యక్షుడు డొనాల్డ్ ట్రంప్ 2024 ఎన్నికల్లో గెలుపును అందుకోవడంలో ప్రపంచ కుబేరుడు ఎలాన్ మస్క్ కీలక పాత్ర పోషించారు. ట్రంప్ ప్రచారంలో దాదాపు 250 మిలియన్ డాలర్లు (సుమారు 21,000 కోట్ల రూపాయలు) ఆర్థిక సాయం అందించిన మస్క్, గెలిచిన తర్వాత ట్రంప్ బృందంలో అత్యంత సన్నిహితుడిగా మారారు. డిపార్ట్‌మెంట్ ఆఫ్ గవర్నమెంట్ ఎఫిషియెన్సీ (డోజీ) ద్వారా ప్రభుత్వ ఖర్చులను తగ్గించేందుకు మస్క్ కీలకంగా పని చేశారు. అయితే ట్రంప్ తీసుకొస్తున్న “బిగ్ బ్యూటిఫుల్ టాక్స్ బిల్” ఈ ఇద్దరి మధ్య స్నేహానికి బీటలు వార్చింది.

ట్రంప్ తన రెండో పదవీకాలంలో ప్రవేశపెట్టిన “ఒన్ బిగ్ బ్యూటిఫుల్ బిల్ యాక్ట్” అనే ఈ బిల్లు 2017లో ఆమోదించిన టాక్స్ కట్‌లను పొడిగించడం, సరిహద్దు భద్రత, రక్షణ రంగంలో ఖర్చులను పెంచడం, ఇమ్మిగ్రేషన్ విధానాలను కఠినతరం చేయడం వంటి అంశాలను కలిగి ఉంది. ఈ బిల్లు హౌస్ ఆఫ్ రిప్రజెంటేటివ్స్‌లో స్వల్ప ఆమోదంతో ఆమోదం పొందినప్పటికీ, ఇప్పుడు సెనెట్‌లో చర్చనీయాంశంగా మారింది. ఈ బిల్లు జాతీయ రుణాన్ని 2.3 నుంచి 5 ట్రిలియన్ డాలర్ల మేర పెంచుతుందని కాంగ్రెషనల్ బడ్జెట్ ఆఫీస్ (CBO) హెచ్చరించింది.అయితే ఎలాన్ మస్క్ ఈ బిల్లును వ్యతిరేకించారు.

ట్రంప్-మస్క్ మధ్య విభేదాలు తీవ్రమవడంతో టెస్లా షేర్లు 14 శాతం పడిపోయాయి. దీంతో అమెరికన్ మార్కెట్‌లో 153 బిలియన్ డాలర్లు (భారత కరెన్సీలో 13 లక్షల కోట్ల రూపాయలకు పైగా) నష్టం వాటిల్లింది. గత ఐదు ట్రేడింగ్ సెషన్లలో నాలుగు రోజులు టెస్లా స్టాక్ క్షీణించింది. ఈ బిల్లులో ఎలక్ట్రిక్ వాహనాలపై 7,500 డాలర్ల టాక్స్ క్రెడిట్‌ను రద్దు చేసే నిబంధన ఉండటం కూడా టెస్లాకు ఆందోళన కలిగించే అంశం. ఈ నిబంధన మస్క్ వ్యాపార ఆసక్తులపై ప్రభావం చూపే అవకాశం ఉందని విశ్లేషకులు హెచ్చరిస్తున్నారు.

ఈ వివాదాల నడుమ ఎలాన్ మస్క్ కొత్త రాజకీయ పార్టీ పెట్టే ఆలోచనలో ఉన్నారనే పుకార్లు జోరందుకున్నాయి. తన అధికారిక ఎక్స్ ఖాతాలో మస్క్, “అమెరికాలో 80 శాతం మధ్యతరగతిని నిజంగా ప్రాతినిధ్యం వహించే కొత్త రాజకీయ పార్టీని సృష్టించే సమయం ఆసన్నమైందా?” అని పోల్ పెట్టారు. ఈ పోల్‌కు నెటిజన్ల నుంచి భారీ స్పందన లభించింది. పోల్‌లో పాల్గొన్న వారిలో 81 శాతం మంది మస్క్ కొత్త పార్టీ పెట్టాలని మద్దతు తెలిపారు. ఈ పోల్ ఫలితాలు మస్క్ రాజకీయంగా కొత్త దిశగా అడుగులు వేస్తారనే అభిప్రాయాలకు బలం చేకూర్చాయి.

ట్రంప్-మస్క్ మధ్య విభేదాలు కేవలం వ్యక్తిగత వివాదంగానే కాక, అమెరికా రాజకీయ, ఆర్థిక రంగాలపై తీవ్ర ప్రభావం చూపే అవకాశం ఉంది. టెస్లా షేర్ల పతనం మస్క్ వ్యాపార ఆసక్తులను దెబ్బతీస్తుండగా, కొత్త రాజకీయ పార్టీ ఏర్పాటు పుకార్లు అమెరికా రాజకీయాల్లో కొత్త అధ్యాయానికి నాంది పలుకుతాయా అనే చర్చ జోరందుకుంది. ఈ ఘటనలు రాబోయే రోజుల్లో ఏ మలుపు తిరుగుతాయో చూడాలి.