– కాంగ్రెస్ పార్టీలో చేరిక
– కిషన్ రెడ్డికి రాజీనామా లేఖ
– బీజేపీని వీడటం బాధగా ఉందన్న మాజీ ఎంపీ
– మేనిఫెస్టో కమిటీ చైర్మన్గా ఉన్న వివేక్
– నోవాటెల్లో రాహుల్ గాంధీతో భేటీ
– చెన్నూరు టికెట్ ఇచ్చే చాన్స్
– వరసగా బీజేపీని వీడుతున్న నేతలు
ఇదేనిజం, హైదరాబాద్: వివేక్ వెంకటస్వామి బీజేపీకి గుడ్ బై చెప్పారు. ఈ మేరకు ఆయన పార్టీ రాష్ట్ర అధ్యక్షుడు కిషన్ రెడ్డికి రాజీనామా లేఖ సమర్పించారు. అనంతరం ఆయన కాంగ్రెస్ అగ్రనేత రాహుల్ గాంధీ సమక్షంలో కాంగ్రెస్ తీర్థం పుచ్చుకున్నారు. బీజేపీని వీడటం బాధగా ఉందని వివేక్ రాజీనామా లేఖలో పేర్కొన్నారు. ప్రస్తుతం ఆయన బీజేపీ మేనిఫెస్టో కమిటీ చైర్మన్ గా ఉన్నారు. వివేక్ వెంకటస్వామి పార్టీ మారబోతున్నారని చాలా రోజులుగా ప్రచారం సాగుతోంది. ఆయన కాంగ్రెస్ పార్టీలో చేరతారని కూడా ఊహాగానాలు వినిపించాయి. అందరూ ఊహించినట్టుగానే ఆయన బీజేపీని వీడారు. ఇక వివేక్ వెంకటస్వామి కాంగ్రెస్ పార్టీలో చేరబోతున్నారు. హైదరాబాద్ నోవాటెల్ హోటల్ లో ఉన్న రాహుల్ గాంధీతో ఆయన భేటీ అయ్యారు. అక్కడే కాంగ్రెస్ పార్టీ కండువా కప్పుకున్నారు. చెన్నూరు టికెట్ ఇచ్చేందుకు కాంగ్రెస్ పార్టీ సూత్రప్రాయంగా అంగీకరించినట్టు సమాచారం.
వివేక్ చేరిక వెయ్యి ఏనుగుల బలం : రేవంత్ రెడ్డి
నోవాటెల్ హోటల్ లో వివేక్ వెంకటస్వామి రాహుల్ గాంధీ సమక్షంలో కాంగ్రెస్ కండువా కప్పుకున్నారు. అనంతరం రెడ్డి మీడియాతో మాట్లాడుతూ.. వివేక్ వెంకటస్వామిని తమ పార్టీలోకి రావాలని ఆహ్వానించామని చెప్పారు. తెలంగాణలో బీఆర్ఎస్ పార్టీని గద్దె దించాలంటే కాంగ్రెస్ పార్టీతోనే సాధ్యమని భావించి వివేక్ కాంగ్రెస్ పార్టీలో చేరారని రేవంత్ అన్నారు. వివేక్ చేరిక కాంగ్రెస్ పార్టీకి వెయ్యి ఏనుగుల బలం ఇచ్చిందని చెప్పారు. కాంగ్రెస్ పార్టీకి ఎంతో అవసరమని రేవంత్ అన్నారు.
కలిసికట్టుగా కేసీఆర్ ప్రభుత్వాన్ని గద్దె దించుతాం : వివేక్
కాంగ్రెస్ పార్టీ నిర్ణయం ప్రకారం తాను పనిచేస్తానని వివేక్ వెంకటస్వామి అన్నారు. కేసీఆర్ సర్కారుకు వ్యతిరేకంగా పనిచేసేందుకే తాను కాంగ్రెస్ పార్టీలో చేరినట్టు చెప్పారు. తనకు టికెట్ ముఖ్యం కాదని వివేక్ అన్నారు. ‘తెలంగాణ సాధన కోసం అందరూ కొట్లాడారు. అందుకే సోనియా గాంధీ రాష్ట్రాన్ని ఇచ్చారు. కానీ ప్రజల ఆకాంక్షలకు అనుగుణంగా బీఆర్ఎస్ ప్రభుత్వం పనిచేయడం లేదు. కేసీఆర్ను గద్దె దించాలంటూ అందరూ కలిసి పనిచేయాలి. అందుకే నేను కాంగ్రెస్ పార్టీలో చేరాను.’ అంటూ వివేక్ పేర్కొన్నారు.
