– అందుకే ఎమ్మెల్సీగా అవకాశం రాలేదా?
– జోరుగా ఊహాగానాలు
– గతంలో తుంగతుర్తి టికెట్ రాకుండా అడ్డుపడ్డ నల్లగొండ నేతలు
– అద్దంకి వరంగల్ వెళితే అడ్డుచెప్పేవారుండరు
– కాంగ్రెస్కు ఆ ఎంపీ సీటులో బలమైన లీడర్ లేరు
– అందుకే అద్దంకి మీద హైకమాండ్ ఫోకస్
ఇదేనిజం, తెలంగాణ బ్యూరో: వరంగల్ కాంగ్రెస్ అభ్యర్థిగా అద్దంకి దయాకర్ పోటీ చేయబోతున్నారని తెలుస్తోంది. ఇటీవల ఆయనకు ఎమ్మెల్సీ అవకాశం వచ్చినట్టే వచ్చి త్రుటిలో తప్పిపోయింది. వరంగల్ ఎంపీ అభ్యర్థిగా అద్దంకిని దించాలని అధిష్ఠానం ఆలోచిస్తోందని.. అందుకే ఆయనకు ఎమ్మెల్సీగా అవకాశం ఇవ్వలేదని తెలుస్తోంది. గత అసెంబ్లీ ఎన్నికల్లో ఆయన తుంగతుర్తి టికెట్ ఆశించారు. అయితే ప్రధానంగా నల్లగొండ జిల్లాకు చెందిన సీనియర్ కాంగ్రెస్ లీడర్లు అడ్డుపడ్డట్టు వార్తలు వచ్చాయి. కోమటిరెడ్డి వెంకట్ రెడ్డి పై ఆయన పరుషపదజాలంతో మాట్లాడటంతోనే అప్పట్లో టికెట్ కు బ్రేకులు పడ్డాయి. ఇక అద్దంకి దయాకర్కు రేవంత్ వర్గంగా ముద్రపడింది. దీంతో ఆయనకు కీలక పదవి వస్తుందని అంతా భావించారు. అయితే తాజాగా వస్తున్న వార్తల ప్రకారం ఆయనకు వరంగల్ ఎంపీ అభ్యర్థిగా అవకాశం రాబోతున్నదని సమాచారం. ఇక్కడ కాంగ్రెస్ టికెట్ ను సిరిసిల్ల రాజయ్య, దొమ్మాటి సాంబయ్య ఆశిస్తున్నారు. రాజయ్య కుటుంబపరమైన ఇబ్బందులతో అపఖ్యాతి మూటగట్టుకున్నారు. ఇక దొమ్మాటి సాంబయ్య వివిధ పార్టీలు మారారు. అయినా ఎన్నికల్లో గెలిచిన ట్రాక్ రికార్డ్ లేదు. దీంతో ఈ సారి ఈ స్థానం నుంచి అద్దంకికి సీటు ఇవ్వబోతున్నట్టు వార్తలు వస్తున్నాయి.
నల్లగొండ నేతల నుంచి లైన్ క్లియర్
ప్రస్తుతం అద్దంకి దయాకర్ నల్లగొండ జిల్లా నేతల నుంచి ఇబ్బందులు ఎదుర్కొంటున్నారు. ఆయనకు గతంలో ఎమ్మెల్యే టికెట్ రాకుండా వారే అడ్డుపడ్డారు. ప్రస్తుతం అద్దంకి జిల్లా మారితే ఈ సమస్య ఉండదు. నల్లగొండ జిల్లా నేతలు జోక్యం చేసుకోరు. ఇక దీనికి తోడు వరంగల్ జిల్లాలో కాంగ్రెస్ పార్టీ బలంగా ఉంది. వరంగల్ పార్లమెంటు పరిధిలోని స్టేషన్ ఘన్ పూర్ మినహా మిగిలిన అన్ని స్థానాల్లోనూ కాంగ్రెస్ పార్టీ విజయం సాధించింది. దీంతో ఎంపీ ఎన్నికల్లో గెలుపు నల్లేరు మీదే నడకేనని కాంగ్రెస్ పార్టీ భావిస్తోంది. అయితే బలమైన అభ్యర్థి కోసం కాంగ్రెస్ వెయిట్ చేస్తుండగా.. తాజాగా అద్దంకి దయాకర్ అధిష్ఠానం దృష్టిలో పడ్డారు. ఇక వరంగల్ పార్లమెంటు నుంచి బీజేపీ, బీఆర్ఎస్ కూడా బలమైన అభ్యర్థులను రంగంలోకి దించాలని చూస్తోంది. బీజేపీ నుంచి మందకృష్ణ బరిలో దిగుతారని వార్తలు వస్తున్నాయి. ఇక బీఆర్ఎస్ కూడా బలమైన అభ్యర్థిని రంగంలోకి దించే చాన్స్ ఉంది. దీంతో కాంగ్రెస్ పార్టీ అద్దంకిని ఎంపిక చేయాలని చూస్తున్నట్టు తెలుస్తోంది. పట్టభద్రుల ఎమ్మెల్సీల ఎన్నికల్లో అద్దంకిని బరిలో దించాలని మరో ఆలోచన కూడా కాంగ్రెస్ చేస్తున్నట్టు సమాచారం. మరి అద్దంకికి వరంగల్ ఎంపీ టికెట్ వస్తుందా? ఆయన గెలుస్తారా? అన్నది వేచి చూడాలి.
