ఏం మనిషివిరా నువ్వు.. భార్య కాళ్లను బైక్ కు కట్టేసీ ఈడ్చుకెళ్లిన దుర్మార్గుడు.. వీడియో వైరల్..!

ఇదేనిజం, నేషనల్ బ్యూరో : తాగిన మైకంలో ఓ భర్త తన భార్యపై క్రూరంగా ప్రవర్తించాడు. తన భార్య కాళ్లకు తాడు కట్టి దాన్ని బైక్‌కు లాక్కెళ్లాడు. ఈ అమానుష ఘటన రాజస్థాన్‌లోని నాగౌర్‌ జిల్లాలో చోటు చేసుకుంది. ఈ ఘటనకు సంబంధించిన దృశ్యాలకు సోషల్ మీడియాలో వైరల్ అయ్యాయి. మట్టి, రాళ్లతో ఉన్న రోడ్డులో మహిళను ఈడ్చుకెళ్తుంటే ఆమె నొప్పితో సాయం కోసం కేకలు వేసింది. అయినా ఆ ముర్ఖుడు పట్టించుకోలేదు. దీన్ని ఆపేందుకు ఒక్కడు కూడా ముందుకు రాలేదు. మహిళను కొంతదూరం లాక్కెళ్లిన తర్వాత అతడు బైక్‌ దిగి ఏదో సాధించినట్లు నడుం మీద చేయి వేసి దర్జాగా నిల్చొని ఉన్నాడు. కాగా, ఈ ఘటన దాదాపు నెలరోజుల క్రితం జరిగినట్లు తెలుస్తోంది. అయితే, జైసల్మేర్‌లో ఉన్న తన సోదరి ఇంటికి వెళ్లాలని భార్య అనుకోగా, భర్త ఆమెపై ఈ విధంగా దాడి చేసినట్లు సమాచారం. సదరు వ్యక్తి ప్రేమ్‌ రామ్‌ మేఘ్‌వాల్‌గా(32) పోలీసులు గుర్తించి అతడిని అదుపులోకి తీసుకున్నారు. మేఘ్‌వాల్‌ కొంత కాలంగా డ్రగ్స్‌‌కు బానిసైనట్లు పోలీసులు తెలిపారు. ప్రస్తుతం బాధిత మహిళ పంజాబ్‌లోని తన తల్లిదండ్రుల వద్ద ఉంటున్నట్లు తెలుస్తోంది.