ఇదే నిజం, ధర్మపురి టౌన్ : జగిత్యాల జిల్లాలోని ధర్మపురి పట్టణంలో జూలై 6న ప్రపంచ జూనోసిస్ దినోత్సవం (World Zoonosis Day) సందర్భంగా జిల్లా పశువైద్య మరియు పశుసంవర్ధక శాఖ ఆధ్వర్యంలో, మున్సిపాలిటీ సహకారంతో ధర్మపురి ప్రాథమిక పశువైద్య కేంద్రంలో ఒక అవగాహన కార్యక్రమం నిర్వహించబడింది. ఈ కార్యక్రమంలో జంతువుల నుండి మనుషులకు సంక్రమించే జూనోటిక్ వ్యాధుల గురించి ప్రజలకు అవగాహన కల్పించడం జరిగింది.
జిల్లా పశువైద్య సహాయ సంచాలకులు డాక్టర్ బోనగిరి నరేష్ మరియు ధర్మపురి వెటర్నరీ డాక్టర్ దుంపల వేణుగోపాల్ ఈ కార్యక్రమంలో పాల్గొని, జూనోటిక్ వ్యాధుల గురించి వివరించారు. ప్రపంచ జూనోసిస్ దినోత్సవం లూయిస్ పాశ్చర్ అనే శాస్త్రవేత్త యాంటీ రేబిస్ టీకాను మొదటిసారిగా మనిషికి విజయవంతంగా ప్రయోగించిన రోజును స్మరించుకుంటూ ప్రతి సంవత్సరం జరుపుకోవడం జరుగుతుందని వారు తెలిపారు.
సుమారు 150కి పైగా జూనోటిక్ వ్యాధులు ఉన్నాయని, వీటిలో రేబిస్ (కుక్క కాటు వల్ల), ఆంత్రాక్స్, టీబీ, బ్రూసెల్లోసిస్ (గొర్రెలు, మేకలు, ఆవులు, గేదెల ద్వారా), మెదడువాపు (పందుల ద్వారా), హిస్టోప్లాస్మోసిస్ (పావురాల ద్వారా), సిట్టెకోసిస్ (చిలుకల ద్వారా), బర్డ్ ఫ్లూ (కోళ్ల ద్వారా), లెప్టోస్పైరోసిస్, ప్లేగు (ఎలుకల ద్వారా), టాక్సోప్లాస్మోసిస్ (పిల్లుల ద్వారా), ట్రైకినోసిస్, టీనియాసిస్ (సరిగా ఉడకని మాంసం తినడం వల్ల) వంటి వ్యాధులు సంక్రమిస్తాయని వారు వివరించారు. అలాగే, ఇటీవల కొత్తగా ఉద్భవిస్తున్న వ్యాధులైన నిఫా వైరస్, ఈబోలా, జికా వైరస్, కోవిడ్-19, కైసనూర్ ఫారెస్ట్ వ్యాధి (కేరళలో), వెస్ట్ నైల్ ఫీవర్ వంటి జంతు సంబంధిత వ్యాధుల గురించి కూడా ప్రజలకు అవగాహన కల్పించారు.
సంబంధిత పదార్థాలను ముట్టినప్పుడు చేతులు మరియు శరీర భాగాలను డిటర్జెంట్ సబ్బుతో శుభ్రం చేసుకోవాలని, ఈ వ్యాధుల నివారణకు పరిశుభ్రత చాలా ముఖ్యమని వారు సూచించారు. ఈ కార్యక్రమంలో భాగంగా, ప్రమాదకరమైన రేబిస్ వ్యాధి నివారణ కోసం 52 పెంపుడు కుక్కలకు ఉచిత యాంటీ రేబిస్ టీకాలు వేయడం జరిగింది. ఈ కార్యక్రమంలో లయన్స్ క్లబ్ సభ్యులు, వెటర్నరీ సిబ్బంది వి.ఎల్.వో. జి. రూప్, ఎల్.ఎస్.ఏలు సంజయ్ కుమార్, గణేష్, ప్రశాంత్, కైలాష్, వి.ఏ. రవి, దామోదర్, మురళి, దేవయ్యా మరియు ఇతరులు పాల్గొన్నారు.
JOIN FOR REGULAR UPDATES
