– జోష్ లేని అమిత్ షా సభ
– ఎన్నికలు హామీలు ఇవ్వకుండా సభ
– కాంగ్రెస్, బీఆర్ఎస్, ఎంఐంపై విమర్శలకు పరిమితం
– ప్రజాకర్షక పథకాలతో దూసుకెళ్తున్న కాంగ్రెస్, బీఆర్ఎస్
– బీజేపీ, బీఆర్ఎస్ ఒక్కటేనని జోరుగా ప్రచారం
ఇదేనిజం, స్పెషల్ బ్యూరో: చాలా గ్యాప్ తర్వాత బీజేపీ కీలక నేత, కేంద్రహోంమంత్రి అమిత్ షా తెలంగాణ రాష్ట్రంలో పర్యటించారు. నిజానికి ఈ సభ మీద కాషాయదళం చాలా ఆశలు పెట్టుకున్నది. గతంలో వివిధ కారణాల వల్ల ఖమ్మం సభ వాయిదా పడింది. దీంతో శ్రేణులు నిరాశకు గురయ్యాయి. తాజాగా బీజేపీ రాష్ట్ర నేతలు అంతా పూనుకొని ఎట్టకేలకు ఖమ్మంలో భారీ బహిరంగ ఏర్పాటు చేశారు. ఈ మీటింగ్ కాషాయపార్టీలో జవసత్వాలు నింపుతుందని అంతా భావించారు. కర్ణాటక ఎన్నికల ఫలితాల తర్వాత వీక్ అయిన కాషాయపార్టీ ఇంకా కోలుకోవడం లేదు. ఓ వైపు బీజేపీ స్టేట్ చీఫ్ ను మార్చడం.. మరోవైపు బీజేపీ, బీఆర్ ఎస్ ఒక్కటేనని జోరుగా ప్రచారం జరగడంతో ఆ పార్టీ వీక్ అయ్యింది. బీజేపీ పెద్దలు కూడా పెద్దగా ఫోకస్ చేయడం లేదన్న టాక్ ఉంది.
షా సభతో జరిగిందేంటి?
అమిత్ షా సభతో బీజేపీ రాష్ట్రంలో పుంజుకుంటుందని కాషాయ కార్యకర్తలు భావించారు. ప్రస్తుతం కాంగ్రెస్, బీఆర్ఎస్ సంక్షేమ పథకాలనే ఎక్కువగా నమ్ముకున్నాయి. దీంతో బీజేపీ కూడా ఏవైనా సంక్షేమ పథకాలను అనౌన్స్ చేస్తుందేమోనని అనుకున్నారు. కానీ అమిత్ షా మాత్రం బీఆర్ఎస్, కాంగ్రెస్, ఎంఐఎం పార్టీలను విమర్శించేందుకు పరిమితమయ్యారు. తప్ప ఒక్క సంక్షేమ పథకం కూడా అనౌన్స్ చేయలేదు.
కాంగ్రెస్, బీఆర్ఎస్, ఎంఐఎంని టార్గెట్ చేసిన షా
చాలా రోజులుగా తెలంగాణ రాష్ట్రంలో బీజేపీ, బీఆర్ఎస్ ఒక్కటేనని జోరుగా ప్రచారం సాగుతోంది. జాతీయ స్థాయిలో రెండు పార్టీల మధ్య ఒప్పందం కుదిరిందని అందులో భాగంగానే లిక్కర్ స్కామ్ కేసును నీరు గార్చి.. బీజేపీ పెద్దలు కవితను సేవ్ చేశారని.. తెలంగాణ రాష్ట్రంలో బండి సంజయ్ ను తప్పించడం కూడా ఒప్పందంలో భాగమేనని జోరుగా ప్రచారం సాగింది. దీంతో తాజాగా అమిత్ షా .. బీఆర్ఎస్ ను టార్గెట్ చేశారు. తాము ఎప్పటికీ బీఆర్ఎస్ తో జత కట్టమని ఖమ్మం వేదికగా ఆయన చెప్పుకోవాల్సి వచ్చింది. ఎంఐఎం పార్టీతో పొత్తు పెట్టుకున్న బీఆర్ఎస్ తో తాము ఎందుకు కలిసి పనిచేస్తామని ఆయన ఖమ్మం సభలో అన్నారు. మొత్తం బీఆర్ఎస్, బీజేపీ ఒక్కటి కాదని జనంలోకి బలంగా తీసుకెళ్లేందుకు షా ట్రై చేశారు. కానీ ప్రజలను ఆకట్టుకొనేలా పెద్దగా హామీలు ఇవ్వలేదు. మరి షా సభతో బీజేపీలో ఎంత జోష్ వస్తుందో వేచి చూడాలి.
