సాఫ్ట్ వేర్ ఉద్యోగం, లక్షల్లో జీతం.. మనసుపడి పెళ్లి చేసుకున్న అమ్మాయితో తరచూ గొడవలు.. కాపురంలో కలతలు.. చివరకు పెళ్లయిన నాలుగు నెలల్లోనే అనుమానాస్పద రీతిలో శవమై కనిపించేలా చేశాయి.
హైదరాబాద్ లో జరిగిన ఈ దారుణ ఘటనకు సంబంధించిన పూర్తి వివరాలు ఇలా ఉన్నాయి.
ఆంధ్రప్రదేశ్ రాష్ట్రంలోని పశ్చిమ గోదావరి జిల్లా పాల్తూరు గ్రామానికి చెందిన 27 ఏళ్ల యువకుడు అల్లూరి నాగ వెంకట సత్యభార్గవ్ చెన్నైలో సాఫ్ట్వేర్ ఉద్యోగం చేస్తున్నాడు.
నాలుగు నెలల క్రితం బంధువుల అమ్మాయితో అతడికి వివాహం జరిగింది.
హైదరాబాద్ లోని ఆర్యసమాజ్ లో వీళ్లిద్దరి పెళ్లి జరిగింది. పెళ్లి తర్వాత కూడా చెన్నైకి వెళ్లి ఇద్దరూ అక్కడే కాపురం పెట్టారు.
పెళ్లయిన కొద్ది రోజుల నుంచే వీరి కాపురంలో కలతలు మొదలయ్యాయి. తరచూ గొడవలు పడుతుండటంతో ఇరు కుటుంబాల సభ్యులు చెన్నైకి వెళ్లి మరీ వీరికి నచ్చచెప్పారు.
ఈ ఏడాది జనవరి నెలలో చెన్నై నుంచి హైదరాబాద్ కు సత్యభార్గవ్ తన భార్య మంజుతో కలిసి వచ్చాడు.
పటాన్ చెరు మండలం ఇద్రేశం సాయి కాలనీలోని ఓ ఫ్లాట్ లో ఉంటున్నారు. ఇరు కుటుంబాల సభ్యులు నచ్చచెప్పిన తర్వాత కొద్ది రోజుల పాటు ఇద్దరూ బాగానే ఉన్నారు.
కానీ మళ్లీ యథావిథిగా ఇద్దరి మధ్య గొడవలు మొదలయ్యాయి. ఫిబ్రవరి 21న సత్యభార్గవ్ తన భార్య మంజుతో గొడవపడ్డాడు.
ఆ తర్వాత తన తమ్ముడు రవితేజకు ఫోన్ చేసి, ఇంట్లో గొడవ జరిగిందని చెప్పాడు. తన స్నేహితుడి ఇంటికి వెళ్తున్నానని చెప్పి ఫోన్ కట్ చేశాడు.
ఫిబ్రవరి 22వ తారీఖు సోమవారం సత్యభార్గవ్ ఇంటికి రవితేజ వెళ్లాడు. తీరా చూస్తే ఇంటి లోపల గడియపెట్టి ఉంది. ఎన్నిసార్లు ఫోన్ చేసినా ఫలితం లేకపోవడంతో తలుపులు పగలగొట్టి లోపలకు వెళ్లి చూశాడు.
హాల్ లో సీలింగ్ కు చున్నీతో ఉరి వేసుకుని ఆత్మహత్య చేసుకున్న స్థితిలో కనిపించాడు.
దీంతో వెంటనే ఈ విషయాన్ని పోలీసులకు ఫిర్యాదు చేశాడు. రవితేజ ఫిర్యాదు మేరకు అనుమానాస్పద మృతిగా పోలీసులు కేసు నమోదు చేసుకుని దర్యాప్తు చేస్తున్నారు.
