బోర్డర్-గవాస్కర్ ట్రోఫీ 2024-25 పెర్త్ వేదికగా నేటి నుంచి తొలి టెస్టు ఆరంభం కానుంది. ఈ టెస్టు కోసం నెట్స్‌లో ఇరు జట్లు చెమటోడ్చుతున్నాయి. ఇరు జట్లు ఇప్పటికే తమ సన్నాహాలను పూర్తి చేసుకుని రంగంలోకి దిగేందుకు ఉవ్విళ్లూరుతున్నాయి. గత రెండుసార్లు ఆస్ట్రేలియా గడ్డపై భారత్‌ సిరీస్‌ గెలిచి చరిత్ర సృష్టించింది. ఈసారి కూడా గెలిచి హ్యాట్రిక్ సాధించాలని టీమ్ ఇండియా ఉవ్విళ్లూరుతోంది.అయితే గత కొద్ది రోజులుగా సీనియర్లు రోహిత్ శర్మ, విరాట్ కోహ్లీ పెద్దగా స్కోర్లు చేలేదు. న్యూజిలాండ్‌ వైట్వాష్, కీలక ఆటగాళ్ల గైర్హాజరు భారత జట్టును కలవరపెడుతున్నాయి. దీంతో అభిమానులు బౌలర్లపైనే ఆశలు పెట్టుకున్నారు. బుమ్రా నేతృత్వంలోని బౌలింగ్ విభాగం పటిష్టంగా ఉంది. సొంతగడ్డపై న్యూజిలాండ్‌తో టెస్టు సిరీస్‌లో టీమిండియా వైట్వాష్ కావడం టెస్టు క్రికెట్ చరిత్రలో ఇదే తొలిసారి. ఈ ఘోర పరాజయం నేపథ్యంలో బోర్డర్ గవాస్కర్ ట్రోఫీ టీమ్ ఇండియా ఇజ్జత్ కు సవాల్ గా మారింది. అంతేకాదు, ప్రపంచ టెస్టు ఛాంపియన్‌షిప్‌లో ఫైనల్‌ బెర్త్‌ను ఖాయం చేసుకోవాలంటే టీమిండియా ఈ సిరీస్‌ను 4-0తో గెలవాలి.
తొలి టెస్టు సెషన్స్ టైమింగ్స్ ఇవే
భారత కాలమానం ప్రకారం ఉదయం 7.20 గంటలకు టాస్ వేస్తారు. 7.50 గంటల నుంచి 9.50 గంటల వరకు తొలి సెషన్, 10.30 గంటల నుంచి 12.30 వరకు రెండో సెషన్ కొనసాగనుంది, 12.50 గంటల నుంచి 2.50 గంటల వరకు చివరి సెషన్ ఉంటుంది. లంచ్ బ్రేక్ కు 40 నిమిషాల సమయం కేటాయించారు.
భారత జట్టు (అంచనా): యశస్వి జైస్వాల్, కేఎల్ రాహుల్, దేవ్‌దత్ పడిక్కల్, విరాట్ కోహ్లీ, రిషబ్ పంత్ (వికెట్ కీపర్), ధృవ్ జురెల్, నితీష్ కుమార్ రెడ్డి, రవిచంద్రన్ అశ్విన్/రవీంద్ర జడేజా, హర్షిత్ రాణా/ఆకాశ్‌దీప్, మహ్మద్ సిరాజ్, జస్‌ప్రీత్ బుమ్రా (కెప్టెన్).
AUSvsIND 1st Test: బోర్డర్-గవాస్కర్ ట్రోఫీ.. టీమిండియా హ్యాట్రిక్ సాధిస్తుందా..?
