– రాష్ట్రంలో రెండు పార్టీల హోరాహోరి
– అంతుచిక్కని ఓటరు నాడి
– తలలు పట్టుకుంటున్న సెఫాలజిస్టులు
– కొన్ని సంస్థల పెయిడ్ సర్వేలు
– కొంతమేర పెరిగిన కాంగ్రెస్ గ్రాఫ్
– గ్రామాల్లో నిశ్శబ్ధ వాతావరణం
– ఊహించని రీతిలో కాంగ్రెస్ పార్టీకి హైప్
– సంక్షేమమే గెలిపిస్తుందని బీఆర్ఎస్ లెక్కలు
– హంగ్ ప్రభుత్వంపై బీజేపీ ఆశలు
ఇదేనిజం, తెలంగాణ బ్యూరో: రాష్ట్రంలో ఏ పార్టీ గెలవబోతున్నదంటే ఎవ్వరూ ఇదమిత్థంగా చెప్పలేకపోతున్నారు. మరో తొమ్మిది రోజుల్లో ఎన్నికలు జరగనుండగా.. ఓటరు నాడి పట్టుకోవడం ఎంతో కష్టంగా మారింది. తలలుపండిన సెఫాలజిస్టులు సైతం గెలుపును అంచనా వేయలేకపోతున్నారు. మరోవైపు పెయిడ్ సర్వేలు మరింత కన్ఫ్యూజ్ చేస్తున్నాయి. ఇక మీడియా సంస్థలు సైతం ఏదో ఒక పార్టీకి అనుకూలంగా మారడంతో నమ్మే పరిస్థితి లేదు. ప్రస్తుతం రాష్ట్రంలో రెండు పార్టీల మధ్య టఫ్ ఫైట్ నడుస్తోంది. ఎవ్వరూ ఊహించని రీతిలో కాంగ్రెస్ గ్రాఫ్ పెరిగిన మాట వాస్తవమే. అయితే ఈ గ్రాఫ్ అధికారం తెచ్చే స్థాయిలో ఉన్నదా? అన్నది డౌటే. ఇక హస్తం పార్టీ ప్రధానంగా ప్రభుత్వ వ్యతిరేకత, ఆరు గ్యారెంటీలను నమ్ముకున్నది. సంక్షేమపథకాలు తమను గెలిపిస్తాయని బీఆర్ఎస్ భావిస్తోంది. దీంతో ఏ పార్టీ పరిస్థితి ఏమిటో ఎవ్వరికీ అంతుచిక్కకుండా పోతున్నది. ఇక రాజకీయ పార్టీలు అంతర్గతంగా చేయించుకుంటున్న సర్వేలు సైతం ఏ విషయాన్ని స్పష్టంగా చెప్పలేకపోతున్నాయి. దీంతో రెండు పార్టీల లీడర్లు ఎటూ తేల్చుకోలేపోతున్నారు.
కాంగ్రెస్ ఆశ ఇదే..
కాంగ్రెస్ పార్టీ ప్రభుత్వ వ్యతిరేకత మీద ఆశలు పెట్టుకున్నది. దీనికితోడు రాష్ట్రంలో కుటుంబపాలన, ముఖ్యమంత్రి కేసీఆర్, మంత్రి కేటీఆర్ ప్రజలకు అందుబాటులో ఉండకపోవడం.. పదేండ్లు ప్రజలు బీఆర్ఎస్ పాలనను చూశారు కనక.. కాంగ్రెస్ పార్టీకి ఒక్క చాన్స్ ఇస్తారని వారు భావిస్తున్నారు. ఇక గ్రామీణ ప్రాంతాల్లో కాంగ్రెస్ పార్టీకి అనూహ్య స్పందన వస్తోంది. దీంతో ఆ పార్టీ లీడర్లు జోష్తో ఉన్నారు.
బీఆర్ఎస్కూ గట్టి నమ్మకం
ఇక రాష్ట్రంలో ఎటువంటి పరిస్థితి ఉన్నప్పటికీ ప్రజలు తమకే ఓటు వేస్తారని బీఆర్ఎస్ భావిస్తోంది. ప్రస్తుతం గ్రామీణ ప్రాంతాల్లో సైలెంట్ మోడ్ ఉందని.. ప్రజలంతా గులాబీ పార్టీకి ఓటు వేయడానికి సిద్ధంగా ఉన్నారని వాళ్లు భావిస్తున్నారు. రైతు బంధు, సాగునీటి ప్రాజెక్టులు, 24 గంటల కరెంటు, పింఛన్లు ఈ అంశాలు తమకు అనుకూలంగా ఉండబోతున్నాయని బీఆర్ఎస్ భావిస్తోంది.
10 సీట్లపై బీజేపీ గురి
భారతీయ జనతాపార్టీకి ఈ దఫా అధికారం మీద పెద్దగా ఆశలేదు. అయితే ఓ 20 సీట్ల మీద ఆ పార్టీ ఫోకస్ పెట్టింది. అందులో 10 స్థానాలపై సీరియస్ గా దృష్టి సారించింది. తాము 10 స్థానాలు గెలిస్తే కింగ్ మేకర్స్ అవుతామని ఆ పార్టీ భావిస్తోంది. ఇక ఆ పార్టీకి బలంగా ఉన్న నియోజకవర్గాల్లో 10 సీట్లు వచ్చే అవకాశం ఉందని విశ్లేషకులు అంచనా వేస్తున్నారు. అయితే ఒకవేళ బీఆర్ఎస్, కాంగ్రెస్ పార్టీ మధ్య టఫ్ ఫైట్ జరిగితే మాత్రం బీజేపీకి సీట్లు రాకపోవచ్చు. రెండు పార్టీల మధ్య నువ్వా నేనా అన్న రీతిలో ఫైట్ జరిగితే ప్రజలు ఈ రెండు పార్టీల్లో ఏదో ఒకటి ఎంచుకుంటారు తప్ప.. మూడో పార్టీ వైపు చూడరు.
పోల్ మేనేజ్ మెంట్ కీలకం
ఇక రెండు పార్టీ మధ్య నువ్వా నేనా ? అన్న రీతిలో ఫైట్ సాగుతున్నప్పుడు పోల్ మేనేజ్ మెంట్ ఎంతో కీలకంగా మారే అవకాశం ఉంది. ప్రస్తుతం చేస్తున్న ప్రచారాలు ఒక ఎత్తైతే .. ఎన్నికల ముందు రోజు ఓటర్ ను పోలింగ్ బూతు వరకు తీసుకెళ్లడం మరో ఎత్తు. ఈ విషయంలో బీఆర్ఎస్ పార్టీ ఆరి తేరింది. ఇక కాంగ్రెస్ పార్టీ సైతం ఈ సారి సీరియస్ గా దృష్టి సారించింది. చివరి రోజు డబ్బు, మద్యం ఏరులై పారితే అంచనాలు తలకిందులై ఫలితాలు మారే అవకాశం ఉంటుంది. డబ్బు పంపిణీ కూడా ఎంతో కీలకమయ్యే చాన్స్ ఉంది. ఈ సారి బీఆర్ఎస్, కాంగ్రెస్ రెండు పార్టీలు డబ్బుకు వెనకాడటం లేదు. ఇక బీఆర్ఎస్ ఇప్పటికే అభ్యర్థులకు రూ. 10 కోట్లదాకా చేరవేసిందని సమాచారం. కాంగ్రెస్ పార్టీ సైతం ఇదే తరహాలో డబ్బులు పంపిణీ చేస్తోంది. ఒక్క రేవంత్ రెడ్డే రాష్ట్రంలోని 50 మంది అభ్యర్థుల ఎన్నికల ఖర్చు భరిస్తున్నట్టు సమాచారం. ఆయనకు తోడు పొంగులేటి శ్రీనివాసరెడ్డి సైతం ఓ 10 మంది అభ్యర్థులకు డబ్బు చేరవేస్తున్నట్టు టాక్. ఇక కర్ణాటక నుంచి కూడా కాంగ్రెస్ పార్టీకి భారీగా డబ్బు వస్తున్నట్టు తెలుస్తోంది. దీంతో డబ్బు పంపిణీ అంశం కూడా అత్యంత కీలకం. మరి ఇటువంటి పరిస్థితుల్లో ఏ పార్టీ గెలవబోతున్నదో తెలియాలంటే డిసెంబర్ 3 వరకు వేచి చూడాల్సిందే.