– తుఫాన్ దెబ్బకు ఇంటిపైకెక్కిన నటుడు
ఇదేనిజం, నేషనల్ బ్యూరో : మిచాన్ తుఫాన్ దాటికి తమిళనాడు జలమయమైంది. చెన్నై వాతావరణం మొత్తం మారిపోయింది. ఎక్కడ చూసిన వర్షాలు. భారీగా కురుస్తున్న వార్షాలకు చెన్నై నగరమంతా చిగురుటాకులా వణికిపోతుంది. లోతట్టు ప్రాంతాలన్నీ నీటితో నిండిపోయాయి. ఇప్పటికే ఎనిమిది మందికి పైగా మరణించారని సమాచారం. చాలా ప్రాంతాల్లో భారీ వృక్షాలు నేలకూలాయి. విద్యుత్ కు తీవ్ర అంతరాయం కలిగింది. నగరాలని నీటితో నిండిపోవడంతో రోడ్ల పై ఉన్న కార్లు కూడా నీళ్లలో కొట్టుకుపోయాయి. చాలా మంది నివాసాల్లో నీరు చేరడంతో పాములు వంటి విష ప్రాణులు కూడా వస్తుండటంతో ప్రజలు ప్రాణాలు అర చేతిలో పెట్టుకొని ఉన్నారు. పలు ప్రధాన నగరాల్లో రెడ్ అలర్ట్ కూడా ప్రకటించారు. ప్రజలు అనుక్షణం అప్రమత్తంగా ఉండాలని కోరుతున్నారు అధికారులు. చాలా మంది ప్రజలు నీటిలో చిక్కుకుపోయారు. దాంతో జనం పడరాని పట్లు పడుతున్నారు. మరోవైపు ఎన్డీఆర్ఎఫ్, ఎస్డీఆర్ఎఫ్ బలగాలు సహాయక చర్యలు చేపట్టాయి. ఇదిలా ఉంటే కొంతమంది సెలబ్రెటీలు ఆర్ధిక సాయం చేసేందుకు ముందుకొచ్చారు. ఈ క్రమంలో విష్ణు విశాల్ చేసిన ట్వీట్ వైరల్‌గా మారింది. విష్ణు విశాల్ కూడా వరదల్లో చిక్కుకున్నారు. కారప్పాకంలోని తమ నివాసంలో నీరు చేరిందని తెలిపాడు. ఇంట్లోకి వరద నీరు రావడంతో ఇంటి పైకి ఎక్కాడు విష్ణు విశాల్. అక్కడి నుంచి ఓ ఫోటోను షేర్ చేశాడు. విద్యుత్, ఇంటర్నెట్ సదుపాయం అందుబాటులో లేదని.. ఇంట్లోకి నీరు రావడంతో సిగ్నల్ దొరక్క ఇంటి పైకి వచ్చాను అని సిగ్నల్ అందగానే ఈ పోస్ట్ను షేర్ చేశాను అని తెలిపాడు.
