– మామిళ్లగూడెంలో విషాదఛాయలు
ఇదే నిజం, తెలంగాణ బ్యూరో: అమెరికాలో కత్తి దాడికి గురై ఆస్పత్రిలో చికిత్స పొందుతున్న ఖమ్మం జిల్లాకు చెందిన యువకుడు వరుణ్‌రాజ్‌ (29) మృతి చెందాడు. ఈ మేరకు కుటుంబసభ్యులకు బుధవారం సమాచారం అందింది. దీంతో వరుణ్ ఇంటివద్ద విషాదఛాయలు అలముకున్నాయి. ఖమ్మంలోని మామిళ్లగూడెం ప్రాంతానికి చెందిన వరుణ్ ఏడాదిన్నర క్రితం అమెరికా వెళ్లాడు. యూఎస్లోని ఇండియానా రాష్ట్రంలో ఓ యూనివర్సిటీలో ఎంఎస్‌ చదువుతూ పార్ట్‌టైం జాబ్‌ చేస్తున్నాడు. గత నెల 31న జిమ్‌ నుంచి ఇంటికి వెళ్తుండగా ఓ దుండగుడు కత్తితో వరుణ్‌పై పొడిచాడు. స్థానికులు పోలీసులకు సమాచారం ఇవ్వడంతో వారు అక్కడికి చేరుకుని యువకుడిని ఆస్పత్రికి తరలించారు. అపస్మారక స్థితిలో ఉన్న వరుణ్‌కు డాక్టర్లు సర్జరీ చేశారు. అప్పటి నుంచి అక్కడ చికిత్స పొందుతున్న వరుణ్ చనిపోయినట్లు మామిళ్లగూడెంలోని అతడి కుటుంబసభ్యులకు సమాచారం అందింది. దీంతో వారు కన్నీరుమున్నీరవుతున్నారు. వరుణ్ తండ్రి రామ్మూర్తి మహబూబాబాద్‌ జిల్లాలో టీచర్గా పనిచేస్తున్నారు.
