ఎన్నికల ప్రచారానికి వెళ్తుండగా మమతా బెనర్జీ కింద పడిపోయారు. హెలికాప్టర్ ఎక్కుతుండగా.. ఆమె ఒక్కసారిగా జారి పడిపోయారు. పశ్చిమ బర్ధమాన్ జిల్లాలోని దుర్గాపూర్ నుంచి అసన్ సోల్‌కు వెళ్లేందుకు మమతా బెనర్జీ హెలికాప్టర్ ఎక్కారు. ఈ క్రమంలోనే లోపలికి వెళ్లి సీట్లో కూర్చునే సమయంలో ఆమె ఒక్కసారిగా పట్టు తప్పి కింద పడిపోయారు. ప్రస్తుతం దేశంలో సార్వత్రిక ఎన్నికలు జరుగుతున్న వేళ.. పార్టీ అధినేతల దగ్గర నుంచి కార్యకర్తల వరకు అవిశ్రాంతగా ప్రచారం చేస్తూనే ఉన్నారు. ఈ క్రమంలోనే ఎన్నికల ప్రచారానికి వెళ్తుండగా.. బెంగాల్ సీఎం, టీఎంసీ అధినేత్రి మమతా బెనర్జీ కిందపడిపోయారు.
మమతా బెనర్జీ హెలికాప్టర్ ఎక్కుతూ పడిపోవడాన్ని అక్కడే ఉన్న సెక్యూరిటీ సిబ్బంది గమనించి వెంటనే సాయం చేశారు. కింద పడిన దీదీని పైకి లేపి.. సీట్లో కూర్చొబెట్టారు. ఈ ఘటనలో దీదీకి చిన్న గాయం అయిందని టీఎంసీ వర్గాలు తెలిపాయి. ఈ సంఘటన తర్వాత ఆమె తన ప్రయాణాన్ని కొనసాగించారని పేర్కొన్నారు. అనంతరం అసన్‌సోల్ వెళ్లి అక్కడ ప్రచారం చేసినట్లు వివరించారు. హెలికాప్టర్ ఎక్కుతుండగా.. మమతా బెనర్జీ కింద పడిపోయిన సంఘటనను అక్కడే ఉన్న కొందరు వీడియో తీసి సోషల్ మీడియాలో పోస్ట్ చేయగా వైరల్‌గా మారింది.
