– అన్ని పార్టీల్లోనూ ఎలక్షన్ మూడ్
– నోటిఫికేషన్కు ముందే వేడెక్కిన రాజకీయం
– సెప్టెంబర్ 17 కేంద్రంగా రాజకీయాలు
– కాంగ్రెస్ బహిరంగసభ, బీజేపీ విమోచన దినోత్సవం
– పాలమూరు ఎత్తిపోతల వెట్రన్ ను ప్రారంభించనున్న కేసీఆర్
– హైదరాబాద్ లో పోటా పోటీ ఫ్లెక్సీలు
Political heat in Telangana: ఇదే నిజం, తెలంగాణ బ్యూరో: తెలంగాణ రాష్ట్రంలో ఎన్నికల వేడి రాజుకున్నది. అన్ని పార్టీలూ ఎన్నికల మూడ్లోకి వెళ్లిపోయాయి. సీడబ్ల్యూసీ మీటింగ్స్ నిర్వహించడం ద్వారా కాంగ్రెస్ ఎన్నికల శంఖారావానికి తెరలేపింది. ఇక బీజేపీ సైతం విమోచన దినోత్సవంలో పాల్గొనబోతున్నది. బీఆర్ఎస్ సైతం తన కార్యాచరణను సిద్ధం చేసుకున్నది. నాగర్కర్నూల్ జిల్లా నార్లాపూర్లో సమీపంలో నిర్మించిన పంప్ హౌస్, జలాశయాన్ని ముఖ్యమంత్రి కేసీఆర్ ప్రారంభించబోతున్నారు. అనంతరం భారీ బహిరంగసభలో ముఖ్యమంత్రి కేసీఆర్ పాల్గొనబోతున్నారు. పాలమూరు, రంగారెడ్డి జిల్లాలకు వరప్రదాయిని లాంటి ఈ ప్రాజెక్టుతో వలస జిల్లా పాలమూరు సస్యశ్యామలం కానున్నది బీఆర్ఎస్ నేతల ప్రచారం చేస్తున్నారు.
విమోచన దినోత్సవంపై బీజేపీ ఫోకస్
తెలంగాణ రాష్ట్రంలో ఎలాగైనా పుంజుకోవాలని బీజేపీ వ్యూహాలు రచిస్తోంది. కర్ణాటక ఎన్నికల ఫలితాల అనంతరం తెలంగాణలో బీజేపీ గ్రాఫ్ డౌన్ అయ్యింది. దీంతో ఎలాగైనా పుంజుకోవాలని బీజేపీ భావిస్తోంది. అందులో భాగంగా సెప్టెంబర్ 17న విమోచనం దినోత్సవం నిర్వహించి ప్రజల్లో ఒకరకమైన సెంటిమెంట్ రగిలించాలని బీజేపీ భావిస్తోంది. ప్రస్తుతం తెలంగాణ రాష్ట్రంలో బీఆర్ఎస్ విమోచన దినోత్సవాన్ని అధికారికంగా నిర్వహించడం లేదు. దీంతో ఈ అవకాశాన్ని ఉపయోగించుకొని తెలంగాణ రాష్ట్రంలో బలపడాలని బీజేపీ భావిస్తోంది.
బీఆర్ఎస్ దూకుడు
ఇక బీఆర్ఎస్ సైతం ఎన్నికల సమరంలో దూసుకుపోతున్నది. అందరికంటే ముందే సీఎం కేసీఆర్ అభ్యర్థులను ప్రకటించారు. ఇప్పటికే ఆ పార్టీ అభ్యర్థులు ప్రచారం చేసుకుంటున్నారు. మరోవైపు నిత్యం అభివృద్ధి కార్యక్రమాల్లో బీఆర్ఎస్ వేగం పెంచింది. ఇక త్వరలో నాగర్ కర్నూల్ జిల్లా లో పాలమూరు ఎత్తిపోతల పథకం వెట్ రన్ ను ముఖ్యమంత్రి కేసీఆర్ ప్రారంభించబోతున్నారు. అక్కడే బీఆర్ఎస్ బహిరంగసభ కూడా నిర్వహించబోతున్నది. ఇందుకోసం బీఆర్ఎస్ నేతలు జనసమీకరణ చేస్తున్నారు. సీడబ్ల్యూసీ మీటింగ్స్ ఉండటంతో జాతీయ మీడియా ఫోకస్ మొత్తం ఆ సమావేశాల మీదే ఉంటుంది. దీంతో బీజేపీ, బీఆర్ఎస్ కూడా ప్రచారంలో దూసుకుపోతున్నాయి.
