– తొమ్మిదేళ్లలో కల్వకుంట్ల ఫ్యామిలీయే బాగుపడింది
– వచ్చే ఎన్నికల్లో కాంగ్రెస్ గెలుపు ఖాయం
– బస్సుయాత్రలో రాహుల్ గాంధీ
ఇదేనిజం, భూపాలపల్లి: తెలంగాణ రాష్ట్రంలో కేసీఆర్ ను ఓడించేందుకు ప్రజలు సిద్ధంగా ఉన్నారని రాహుల్ గాంధీ పేర్కొన్నారు. గురువారం భూపాలజిల్లా జిల్లా కాటారంలో నిర్వహించిన బస్సుయాత్రలో ఆయన పాల్గొన్నారు. తెలంగాణ రాష్ట్రంలో అవినీతి జరుగుతోందని చెప్పిన బీజేపీ ఎందుకు విచారణ జరపడం లేదని ప్రశ్నించారు. సీబీఐ, ఈడీ లాంటి దర్యాప్తు సంస్థలు కేసీఆర్ విషయంలో మౌనంగా ఎందుకు ఉన్నాయని ప్రశ్నించారు. తెలంగాణలో ఇన్నేళ్లు కుటుంబ పాలన నడిచిందన్నారు. కేసీఆర్ ఆయన ఫ్యామిలీ భారీ అవినీతి పాల్పడిందని ఆరోపించారు. వారి అవినీతిని వేరే రాష్ట్రాలకు విస్తరించారని మండిపడ్డారు. ఈ తొమ్మిదేళ్లలో కేసీఆర్ ప్రభుత్వం బాగుపడిందే తప్ప తెలంగాణ ప్రజలు బాగుపడలేదన్నార రాహుల్. అందుకే ఈ ఎన్నికలు దొరల తెలంగాణకు, ప్రజల తెలంగాణకు జరుగుతున్నవిగా అభివర్ణించారు. ప్రజల ఉత్సాహం చూస్తుంటే ఈసారి కచ్చితంగా తెలంగాణలో కాంగ్రెస్ ప్రభుత్వ వస్తుందని ధీమా వ్యక్తం చేశారు. కేసీఆర్ విషయంలో సైలెంట్ గా ఉన్న ఈడీ, సీబీఐ తనపై మాత్రం 24 కేసులు పెట్టారని ఆరోపించారు. తెలంగాణలో బీజేపీ, బీఆర్‌ఎస్ ఎంఐఎం కలిసి పని చేస్తున్నాయని ఆరోపించారు రాహుల్. ఈ మూడు పార్టీలు కాంగ్రెస్‌ను టార్గెట్ చేశాయన్నారు.
