– రేవంత్ స్టేట్మెంట్ బూమరాంగ్
– ఎన్నికల అజెండాగా మారిపోయిన విద్యుత్ అంశం
– డీకే ప్రకటనతో మరింత గందరగోళం
– తలపట్టుకుంటున్న హస్తం పార్టీ
– రైతు బంధు దుబారా అంటూ ఉత్తమ్ స్టేట్ మెంట్
– బీఆర్ఎస్కు అస్త్రాలు అందించిన హస్తం లీడర్లు
– ప్రతి సభలోనూ ఇదే అంశాన్ని ప్రస్తావిస్తున్న కేసీఆర్
– కాంగ్రెస్ పార్టీ సెల్ఫ్ గోల్
ఇదేనిజం, తెలంగాణ బ్యూరో: రేవంత్ రెడ్డి కొన్ని రోజులు క్రితం అమెరికాలో చేసిన వ్యాఖ్యలు ఇప్పుడు కాంగ్రెస్ పార్టీ మెడకు చుట్టుకున్నాయి. రేవంత్ ఏ సందర్భంలో అన్నారు.. ఏ సమయంలో అన్నారో పక్కకు పెడితే.. వ్యవసాయానికి మూడు గంటల విద్యుత్ సరిపోతుందని అమెరికాలోని ఓ సభలో వ్యాఖ్యానించారు. ఈ కామెంట్లు బూమరాంగ్ అయి కాంగ్రెస్ పార్టీ మెడకు చుట్టుకున్నాయి. కాంగ్రెస్ పార్టీ అధికారంలోకి వస్తే కరెంటు ఉండదని బీఆర్ఎస్ నేతలు విస్తృతంగా ప్రచారం చేస్తున్నారు. గత కాంగ్రెస్ పాలనలో విద్యుత్ సమస్యలు ఉండేవి కాబట్టి ప్రజలు కూడా నిజమని నమ్ముతున్నారు. ఇక ఇటీవల కర్ణాటక డిప్యూటీ సీఎం డీకే శివకుమార్ తెలంగాణలో పర్యటించి తాము కర్ణాటకలో ఐదు గంటల కరెంట్ ఇస్తున్నామని వ్యాఖ్యానించారు. వెరసి ఈ ప్రకటనలు మొత్తం కాంగ్రెస్ మెడకు చుట్టుకున్నాయి. తాను అలా అనలేదని రేవంత్ అంటున్నారు. అయితే అందుకు సంబంధించిన వీడియోలను బీఆర్ఎస్ కార్యకర్తలు సోషల్ మీడియాలో పోస్ట్ చేస్తున్నారు. దీంతో ఏం సమాధానం చెప్పాలా? అర్థం కాక కాంగ్రెస్ లీడర్లు తలలుపట్టుకుంటున్నారు.
గతంలో చంద్రబాబు మెడకు..
ఇక విద్యుత్ అంశం గతంలో చంద్రబాబును సైతం ఉక్కిరి బిక్కిరి చేసింది. ఆయన ఉమ్మడి రాష్ట్రంలో అధికారంలో ఉన్నప్పుడు విపరీతంగా కరెంటు కోతలు ఉండేవి. దీంతో రైతులు తీవ్ర ఇబ్బందులు పడేవారు. దీనికితోడు విద్యుత్ చార్జీలు పెంచడాన్ని నిరసిస్తూ చంద్రబాబు హయాంలో రైతులు ఉద్యమిస్తే వారిపై కాల్పులు జరిపి చంద్రబాబు అపఖ్యాతిని మూటగట్టుకున్నాడు. ఇప్పటికీ బాబు మీద ఆ మరక పోవడం లేదు. రైతు వ్యతిరేకిగా చంద్రబాబు మీద ముద్ర పడింది. తెలంగాణ ఉద్యమసమయంలోనూ విద్యుత్ విషయంలో అనేక చర్చలు జరిగాయి. రాష్ట్రం విడిపోతే కరెంట్ ఉండదని అనేకమంది ఆంధ్రా మేధావులు చెప్పారు. అప్పటి సీఎం కిరణ్ కుమార్ రెడ్డి ఏకంగా ఇందుకు సంబంధించిన పవర్ పాయింట్ ప్రజెంటేషన్ కూడా ఇచ్చారు. ఇదిలా ఉంటే కేసీఆర్ ఎంతో విజయవంతంగా తెలంగాణలో విద్యుత్ అంశాన్ని పరిష్కరించారు. ప్రస్తుతం రాష్ట్రంలో పెద్దగా కోతలు లేకుండా కరెంటు నిరంతరాయంగా సరఫరా అవుతోంది. ఏదైనా మరమ్మతులు వంటి కారణాలు ఉన్నప్పుడు మాత్రమే విద్యుత్ కోతలు ఉంటున్నాయి. ఇది ప్రజలందరికీ తెలిసిన విషయమే. ఇక 24 గంటల విద్యుత్ ఇవ్వడాన్ని బీఆర్ఎస్ ప్రభుత్వం గొప్పగా చెప్పుకుంటోంది. అయితే రేవంత్ రెడ్డి మాత్రం.. 24 గంటల విద్యుత్ అవసరమేంటి? అన్నట్టుగా మాట్లాడటం బూమరాంగ్ అయ్యింది. ఆయన లౌక్యం తెలియకే అలా మాట్లాడారని సొంతపార్టీ నేతలు చర్చించుకుంటున్నారు.
కౌంటర్ చేయడంలో కాంగ్రెస్ ఫెయిల్
రేవంత్ మూడు గంటల విద్యుత్ సరిపోతుందని చెప్పడాన్ని బీఆర్ఎస్ ప్రచారాస్త్రంగా మలుచుకున్నది. ముఖ్యమంత్రి కేసీఆర్, మంత్రులు కేటీఆర్, హరీశ్ రావు ఏ సభకు వెళ్లినా ఇదే అంశాన్ని తెరమీదకు తీసుకొస్తున్నారు. అయితే రేవంత్ కామెంట్లను కౌంటర్ చేయడంలో కాంగ్రెస్ ఫెయిల్ అవుతోంది. మరోవైపు డీకే శివకుమార్ తాము ఐదు గంటలు మాత్రమే కరెంట్ ఇస్తున్నామని చెప్పడంతో కాంగ్రెస్ పార్టీకి మరింత నష్టం చేకూరింది. తెలంగాణ రాష్ట్రంలో ఒకవేళ 24 గంటల కరెంట్ ఇస్తే తాను ఇక ఎన్నికల్లో పోటీ చేయబోనని జానారెడ్డి సవాల్ విసిరారు. ఇక రేవంత్ రెడ్డి మూడు గంటల విద్యుత్ ఆరోపణలు ఖండించేందుకు ఆపసోపాలు పడుతున్నారు. ఉచిత విద్యుత్ తీసుకొచ్చింది కాంగ్రెస్ పార్టీయేనని చెప్పుకొనే ప్రయత్నం చేస్తున్నారు. అయినప్పటికీ మూడు గంటల విద్యత్ అంశమే నిత్యం చర్చలో ఉండేలా బీఆర్ఎస్ ప్లాన్ చేస్తోంది. రాజకీయాల్లో ఆయుధాలను మనం సమకూర్చుకోవాల్సిన అవసరం ఉండదు.. శత్రువే మన చేతికి అందిస్తారన్న అంటుంటారు. ప్రస్తుతం అదే పరిస్థితి కనిపిస్తోంది. కేసీఆర్ చేతికి కాంగ్రెస్ నేతలు ఆయుధాన్ని అందించారన్న చర్చ జరుగుతోంది. దీనికి తోడు ధరణి తీసేస్తామని కాంగ్రెస్ ప్రకటించడం.. రైతు బంధు దుబారా అని ఉత్తమ్ వ్యాఖ్యానించడం సైతం బీఆర్ఎస్ కు ఆయుధాలుగా మారాయి. మరి ఎన్నికల నాటికి మూడు గంటల విద్యుత్ అంశం ఏ మేరకు ప్రభావం చూపుతుందో వేచి చూడాలి.
