Nara lokesh: వైఎస్సార్సీపీ నేతలు యువతను గంజాయికి బానిసలుగా మారుస్తున్నారని టీడీపీ జాతీయ ప్రధాన కార్యదర్శి నారా లోకేశ్ మండిపడ్డారు. ‘సే నో టూ గంజాయి’ అని యువతకు పిలుపునిచ్చారు. టీడీపీ అధికారంలోకి వచ్చిన వెంటనే విద్యార్థులకు ఆర్టీసీ బస్సుల్లో ఉచిత ప్రయాణ సౌకర్యం, కెరియర్ కౌన్సిలింగ్ వ్యవస్థ ఏర్పాటు చేస్తామని హామీ ఇచ్చారు. రాష్ట్రాన్ని కాపాడుకోవడానికి యువత ముందుకు రావాలని పిలుపునిచ్చారు.
చంద్రబాబు హయాంలో రాష్ట్రం జాబ్ క్యాపిటల్ ఆఫ్ ఇండియాగా ఉంటే జగన్ పాలనలో గంజాయి క్యాపిటల్ ఆఫ్ ఇండియాగా మారిందని తెలుగు దేశం పార్టీ జాతీయ ప్రధాన కార్యదర్శి నారా లోకేశ్ ఆరోపించారు.141వ రోజు యువగళం పాదయాత్రలో భాగంగా గూడూరు నియోజకవర్గం కాకువారిపాలెం బస ప్రాంతంలో యువతతో నిర్వహించిన ముఖాముఖి కార్యక్రమంలో ఆయన పాల్గొన్నారు. యువత, విద్యార్థులు తాము ఎదుర్కొంటున్న సమస్యలను లోకేశ్కు వివరించారు. జాబ్ క్యాలెండర్ విడుదల చేస్తామని జగన్ ప్రభుత్వం మోసం చేసిందని.. సంక్షేమ హాస్టళ్లలో సౌకర్యాలు లేక అనేక ఇబ్బందులు పడుతున్నామని లోకేశ్ వద్ద వాపోయారు. అవసరమైనన్ని ప్రభుత్వ ఇంజినీరింగ్, డిగ్రీ కళాశాలలు లేక ఇబ్బంది పడుతున్నామని చెప్పారు. మెగా డీఎస్సీ నిర్వహిస్తానని జగన్ మోహన్ రెడ్డి మోసం చేశాడన్నారు.
